चंडीगड: न्यायालयात नोकरी हवी, २० तारखेला भेट. दुकानासमोरील अतिक्रमणे दूर करायची आहेत, लगेच फोन करतो, महाविद्यालयात मुलीला ॲडमिशन पाहिजे..मिळवून देतो, दोन दिवसांनी लग्न आहे, नक्की येतो.. मतदारांच्या अशा अनेक मागण्या मार्गी लावण्याचे आश्वासन देत उमेदवार त्यांना ‘प्रसन्न’ करण्याचे प्रयत्न करीत असल्याचे पंजाब मध्ये मंगळवारी दिसून आले.

पंजाब काँग्रेसमधील हेवीवेट मंत्री बलबीर सिंग सिद्धू हे मोहालीतून तिसऱ्यांदा रिंगणात आहेत. त्यांच्या निवासस्थानी सकाळी पोहोचल्यावर प्रचाराची धामधूम सुरू असतानाच नागरिकांच्या अडचणींचे निवारण करण्यासाठी त्यांनी सकाळी ८ ते १० हा वेळ राखून ठेवला आहे. त्या वेळी त्यांनी ‘सकाळ’शी संवाद साधला. आरोग्यमंत्री असताना राज्याच्या सीमा ही माझी चौकट होती, आता उमेदवार असल्यामुळे मोहाली मतदारसंघच माझी चौकट आहे,

असे म्हणत त्यांनी पंजाबमधील काँग्रेसच्या राजकारणावर काही बोलण्याचे टाळले. मात्र, लोकसभेचा वापर प्रचारासाठी झाल्याची खंत व्यक्त केली तर, पंजाब हा काँग्रेसचा बालेकिल्ला आहे. कारण शेतकरी हे पूर्वीपासूनच काँग्रेससोबत आहेत. ज्यांना (‘आप’च्या लोकांना) शेतीमधील काही कळत नाही, ते कसे शेतकऱ्यांचे प्रश्न सोडविणार, असाही प्रश्न त्यांनी उपस्थित केला. प्रचाराच्या काळातही नागरिकांसाठी वेळ कसा राखून ठेवता, असे विचारल्यावर, त्यांची कळी खुलली अन हेच माझे वैशिष्ट्य आहे, असे सांगत प्रत्येक नागरिकाचे कायमच समाधान करण्याचा प्रयत्न करतो, असा दावा त्यांनी केला. आधार कार्डबद्दलची समस्या, नोकरीमध्ये होत असलेला त्रास, पाणीपट्टीचे वाढीव बिल या बद्दलच्या तक्रारींचे निवारण करतानाच प्रचाराच्या नियोजनाचा आढावा ते घेतात. सकाळचे दहा- सव्वा दहा झाल्यावर कार्यकर्त्यांची गर्दी वाढू लागते, तसे ट्रॅकसूटमध्ये असलेले बलबीर कपडे बदलून प्रचारासाठी बाहेर पडतात. यंदाही ते राज्यात विक्रमी मतांनी विजयी होतील, असा अंदाज त्यांचे निकटवर्तीय व्यक्त करतात. मोहालीचे माजी महापौर कुलवंतसिंग हे त्यांना ‘आप’च्या उमेदवारीवर आव्हान देत आहेत.