मुंबई : प्रमुख बाजारपेठांमधील मजबूत मागणीमुळे देशातून आर्थिक वर्ष २०२३-२४ च्या पहिल्या तिमाहीत मोटार निर्यातीत वार्षिक १८.६ टक्के वाढ झाली असून, एक लाख ८० हजार ४८३ मोटारी निर्यात करण्यात आल्याचे सोसायटी ऑफ इंडियन ऑटोमोबाइल मॅन्युफॅक्चरर्सने (सियाम) म्हटले आहे. देशांतर्गत बाजारपेठेत १० लाख २६ मोटारींची विक्री झाली, यात केवळ वार्षिक तीन टक्के वाढ नोंदवली गेली, असेही ‘सियाम’ने म्हटले आहे.

देशांतर्गत बाजारपेठेत पहिल्या तिमाहीत घट होण्याचे एक कारण म्हणजे लहान मोटारींची मागणी कमी होत आहे. सेडान आणि हॅचबॅक मोटारींची देशांतर्गत विक्री जूनमध्ये १७.५ टक्क्यांनी घसरून तीन लाख ४१ हजार २९३ वर आली आहे. मॉन्सून आणि आगामी सणासुदीच्या हंगामात चांगल्या वाढीची अपेक्षा आहे, असे ‘सियाम’चे अध्यक्ष विनोद अग्रवाल यांनी सांगितले.

वितरकांकडे शिल्लक साठा मोठा असल्याने चिंता व्यक्त होत आहे. मात्र, हे काळजीचे कारण नाही. कधी कंपनी जास्त उत्पादन करते, कधी कमी करते. हे चढ-उतार होतच राहतात. मागणी आणि पुरवठा यांच्यात चांगला समतोल आहे. समतोल राखण्यासाठी कंपन्या आवश्यक सुधारणात्मक उपाययोजना करतील, असेही त्यांनी स्पष्ट केले.

मारुती सुझुकी आणि टोयोटा सारख्या कंपन्या हायब्रीड मोटारींसाठी अधिक सवलती देण्याच्या बाजूने आहेत, तर टाटा मोटर्स, महिंद्रा अँड महिंद्रा आदी कंपन्या सरकारला फक्त इलेक्ट्रिक मोटारींवर लक्ष केंद्रित करण्यास सांगत आहेत.

‘सियाम’च्या आकडेवारीनुसार, जून २०२४ मध्ये एकूण १९ लाख ६७ हजार ९५९ वाहनांची विक्री झाली. जून २०२३ मधील १६ लाख ६४ हजार ४५१ वाहनांच्या तुलनेत त्यात १८.२३ टक्के वाढ झाली आहे.

यात प्रवासी मोटारींच्या विक्रीत मात्र १३.७२ टक्क्यांनी घसरण झाली आहे. दुचाकींच्या विक्रीत मात्र, २१.२९ टक्क्यांनी वाढ झाली आहे. जून २०२४ मध्ये १६ लाख १४ हजार १५४ दुचाकींची विक्री झाली असून, जून २०२३मध्ये १३ लाख ३० हजार ८२६ वाहनांची विक्री झाली होती.

तीनचाकी वाहनांच्या विक्रीतही १२.२९ टक्क्यांनी वाढ झाली असून, जून २०२४ मध्ये ५९ हजार ५४४ वाहनांची विक्री झाली आहे, जून २३ मध्ये हे प्रमाण ५३ हजार २५ होते. सर्व प्रकारच्या प्रवासी वाहनांच्या विक्रीत ४.८८ टक्क्यांनी वाढ झाली आहे. जून २०२३ मधील दोन लाख ८० हजार ५५३ वाहनांच्या तुलनेत जून २०२४ मध्ये दोन लाख ९४ हजार २३३ वाहनांची विक्री झाली आहे.

वाहनांची एकूण निर्यात २२.०४ टक्क्यांनी वाढली असून, जून २०२४ मध्ये तीन लाख ९३ हजार ५८५ वाहनांची निर्यात झाली आहे. जून २०२३ मध्ये हे प्रमाण तीन लाख २२ हजार ५१७ होते. वाहनांच्या उत्पादनातही २०.४५ टक्क्यांनी वाढ झाली असून, जून २०२४ मध्ये २३ लाख ५८ हजार ४१ वाहनांचे उत्पादन झाले, जून २०२३ मध्ये हे प्रमाण १९ लाख ५७ हजार ६४० होते.

अहवालातील ठळक बाबी

• जून २०२४ मध्ये एकूण वाहनविक्री १९ लाख ६७ हजार ९५९, वार्षिक १८.२३ टक्के वाढ

• दुचाकी विक्री २१.२९ टक्के, तीनचाकी विक्री १२.२९ टक्के वाढ

• प्रवासी वाहनांची विक्री ४.८८ टक्के अधिक

• एकूण निर्यात तीन लाख ९३ हजार ५८५, वार्षिक २२.०४ टक्के वाढ

• उत्पादन २३ लाख ५८ हजार ४१ वाहने, वार्षिक २०.४५ टक्के वाढ