स्मार्ट सल्ला

गोपाळ गलगली,ज्येष्ठ गुंतवणूकतज्ज्ञ

जेसीबी, पोकलेन, बुलडोझर ही नावे उच्चारताच डोळ्यासमोर पिवळी अजस्र यंत्रे उभी रहातात. या अजस्र यंत्रांच्या कामाचा व्याप डोळे विस्फारून टाकणारा असतो. जमिनीवरची ही यंत्रे आणि बहुमजली इमारतीवरच्या ‘क्रेन्स’ ही आधुनिक सुधारणेच्या खुणा आहेत. ‘ॲक्शन कन्स्ट्रक्शन, एल्स्टार, लायबेहेर, बेल्को, सॅनी, एस्कॉर्टस् टाटा हिताची यांच्या क्रेन्स बहूमजली इमारतीवर लोखंड, सिमेंटची ओझी खालीवर करताना दिसत असतात. यातल्या काही कंपन्यांची ओळख :

जेसीबी कंपनी

अनेकांना ‘जेसीबी’ कंपनीचे पूर्ण नाव माहित नसते. ‘जोसेफ सिरिल बॅमफोर्ड’ असे या कंपनीचे पूर्ण नाव आहे. मूळ इंग्लिश कंपनीने १९७९ मध्ये भारतात कारखाना काढला. कंपनीचे भारतात पुणे(तळेगाव), जयपूर, वडोदरा, वल्लभगड या ठिकाणी कारखाने आहेत. स्किडस्टिअर लोडर, एस्कॅव्हेटर, टेलीहॅंडलर यांसारखी अनेक उत्पादने ही कंपनी तयार करते. कंपनीची ही यंत्रे हायड्रोजनवर चालविण्याचे प्रयोग सुरू आहेत. त्यांची किंमत १२ ते ७५ लाख रुपयांपर्यंत असून, भाड्यानेदेखील मिळू शकतात. पायाभूत सुविधा क्षेत्रात मोठी कामे सुरू असल्याने या यंत्रांना मागणी चांगली राहणार आहे.