मुंबई : कॅनरा बँकेने ग्राहकांच्या सोयीसाठी अनेक नव्या सुविधा आणि योजना दाखल केल्या आहेत. बँकेच्या मुख्यालयात आयोजित कार्यक्रमात रिझर्व्ह बँकेच्या ‘इनोव्हेशन हब’चे सीईओ राजेश बन्सल, कॅनरा बँकेचे एमडी आणि सीईओ के. सत्यनारायण राजू, कार्यकारी संचालक देबाशीष मुखर्जी, अशोक चंद्रा, हरदीप यांच्या उपस्थितीत या सेवासुविधांचे आणि योजनांचे उद्‍घाटन करण्यात आले.

यावेळी ‘कॅनरा हील’ या आरोग्यसेवेसाठीच्या कर्ज योजनेसह महिलांसाठी कॅन्सर केअर पॉलिसीची सुविधा देणारे ‘कॅनरा एंजल’ हे विशेष बचत खाते, ‘कॅनरा रेडीकॅश’ ही पूर्व-मंजूर वैयक्तिक कर्ज योजना; तसेच मुदतठेवीवर ऑनलाइन कर्ज देणारी ‘कॅनरा मायमनी’ योजना दाखल करण्यात आली.

‘कॅनरा यूपीआय १२३ पे एएसआय’ हा सुलभ पेमेंट इंटरफेस आणि बँकेच्या कर्मचाऱ्यांसाठी ‘कॅनरा एचआरएमएस’ या अॅपचे अनावरणदेखील यावेळी करण्यात आले. यावेळी राजेश बन्सल यांच्या हस्ते ‘कॅनरा एसएचजी ई-मनी’ नावाने स्वयंसहाय्यता गटासाठी डिजिटल सुविधेचे अनावरण करण्यात आले. या सुविधेमुळे रिझर्व्ह बँकेच्या इनोव्हेशन हबच्या सहकार्याने स्वयंसहाय्यता गटांना डिजिटल कर्जसेवा देणारी कॅनरा बँक ही पहिली बँक ठरली आहे.

बँकेने मिडीअसिस्ट हेल्थकेअर सर्व्हिसेस आणि बजाज अलियान्झ जनरल इन्शुरन्स या दोन कंपन्यांबरोबर ‘कॅनरा हील’ योजनेबाबत सामंजस्य करारही केला. ‘मिडीअसिस्ट’चे सीईओ गिदुगु सतीश आणि ‘बजाज अलियान्झ’च्या वरिष्ठ अध्यक्ष अल्पना सिंग यावेळी उपस्थित होत्या.