World Bank on India: येत्या 2 वर्षात जगामध्ये भारताचा प्रभाव आणखी वाढणार आहे. कारण भारत पुढील 2 वर्षात 6 टक्क्यांहून अधिक विकास साधून जगातील सर्वात वेगाने वाढणारी अर्थव्यवस्था राहील. असा अंदाज जागतिक बँकेने वर्तवला आहे.

मंगळवारी दिलेल्या माहितीत जागतिक बँकेने सांगितले की, भारतीय अर्थव्यवस्थेची आर्थिक वाढ वर्ष 2025 मध्ये 6.4 टक्के आणि आर्थिक वर्ष 2026 मध्ये 6.5 टक्के वाढ होईल. जागतिक बँकेच्या अहवालानुसार गुंतवणुकीचा वेग काहीसा कमी राहील पण त्याचा पाया मजबूत राहील. सरकारी खर्च आणि कॉर्पोरेट बॅलन्स शीटमुळे अर्थव्यवस्था मजबूत राहील. बँकांची स्थितीही चांगली राहण्याची अपेक्षा आहे.

जागतिक बँकेने 2024 मध्ये सलग तिसऱ्या वर्षी जागतिक विकासदर मंदावण्याची शक्यता वर्तवली आहे. 2024 मध्ये जागतिक विकासदर 2.4 टक्क्यांपर्यंत घसरण्याची शक्यता आहे. जो 2023 मध्ये 2.6 टक्के होता.

या अहवालात म्हटले आहे की, जगभर संघर्ष पाहायला मिळत आहे. युक्रेन आणि मध्यपूर्वेमध्ये होत असलेल्या संघर्षांमुळे ऊर्जेच्या किंमती वाढून महागाईवर नकारात्मक परिणाम होण्याची शक्यता आहे. जागतिक बँकेच्या म्हणण्यानुसार, उत्तर अमेरिका, युरोप आणि मध्य आशियातील वाढ यंदा कमी राहू शकते.

एनएसओ आणि रिझर्व्ह बँक व्यतिरिक्त, अनेक आंतरराष्ट्रीय संस्थांनी देखील भारताचा आर्थिक विकास दर मजबूत राहण्याचा अंदाज वर्तवला आहे. चालू आर्थिक वर्षात सुमारे 7 टक्के वाढीचा दर म्हणजे भारत सध्या जगातील सर्वात वेगाने वाढणारी अर्थव्यवस्था आहे. येत्या काही वर्षांत जागतिक मंदीनंतरही भारताची ही वाढ कायम राहील, असा विश्‍वास जागतिक बँकेला आहे.