Stock Market: मध्यपूर्वेतील इराण आणि इस्रायल यांच्यातील वाढत्या तणावामुळे जागतिक बाजारात खळबळ उडाली असून, त्याचा परिणाम भारतीय शेअर बाजारावरही दिसून आला. इराणने इस्रायलवर 180 हून अधिक क्षेपणास्त्रे डागल्यानंतर कच्च्या तेलाच्या किमती वाढल्या आहेत.

यासोबतच जागतिक पुरवठा साखळीवरील युद्धाच्या परिणामाबद्दल गुंतवणूकदारांमध्ये चिंता वाढली आहे. भारतीय शेअर बाजारात काल घसरण झाली. निफ्टीमध्येही हीच स्थिती दिसून आली. या महायुद्धाचा सर्वाधिक परिणाम भारतातील 14 मोठ्या कंपन्यांवर झाला आहे, ज्यात अदानी समूहापासून टाटा समूहापर्यंतच्या कंपन्यांचा समावेश आहे.

इस्रायलमध्ये उपस्थिती असलेल्या भारतीय कंपन्यांमध्ये 14 पेक्षा जास्त लिस्टेड कंपन्यांचा समावेश आहे, ज्यापैकी अनेकांवर संकटाचा मर्यादित परिणाम होऊ शकतो. यातील काही प्रमुख कंपन्यांच्या शेअर्समध्ये घसरण झाली आहे.

इस्रायलच्या हैफा बंदराची मालकी असलेल्या अदानी पोर्ट्सचे शेअर्स 2.5% घसरले आणि BSE वर 1,429.35 रुपयांवर व्यवहार करत होते. त्याच वेळी, इस्रायलच्या तारो फार्मास्युटिकल्समध्ये बहुसंख्य हिस्सेदारी असलेल्या सन फार्मास्युटिकल्सचे शेअर्स स्थिर राहिले.

याशिवाय, गुंतवणूकदार डॉ. रेड्डीज आणि ल्युपिन या प्रमुख जेनेरिक औषध कंपन्यांवरही लक्ष ठेवून होते. इतर कंपन्यांमध्ये खाण क्षेत्रातील NMDC आणि ज्वेलरी फर्म कल्याण ज्वेलर्स आणि टायटन यांचाही इस्रायलशी संबंध आहे.

माहिती तंत्रज्ञान क्षेत्रातील गुंतवणूकदारांनी टाटा कन्सल्टन्सी सर्व्हिसेस (TCS), विप्रो, टेक महिंद्रा आणि इन्फोसिस यांसारख्या इस्रायलमध्ये असलेल्या कंपन्यांच्या शेअर्सवरही लक्ष केंद्रित केले होते. याशिवाय स्टेट बँक ऑफ इंडिया (SBI), लार्सन अँड टुब्रो (L&T) या कंपन्यांच्या शेअर्सवरही परिणाम होऊ शकतो.

इराण आणि इस्रायल यांच्यातील वाढत्या तणावामुळे तेल पुरवठा साखळ्यांमध्ये व्यत्यय येण्याबद्दल चिंता वाढली आहे, ज्यामुळे जागतिक वित्तीय बाजारांमध्ये अस्थिरता वाढली आहे.

इस्रायलने इराणच्या तेल पायाभूत सुविधांना लक्ष्य केल्यास कच्च्या तेलाच्या किमती आणखी वाढू शकतात, असे तज्ज्ञांचे म्हणणे आहे. ब्रेंट क्रूड फ्युचर्सच्या किमती गुरुवारी 1% पेक्षा जास्त वाढून 75 डॉलर प्रति बॅरलवर पोहोचल्या आहेत.

या परिस्थितीवर गुंतवणूकदारांनी बारीक लक्ष ठेवण्याची गरज असल्याचे विश्लेषकांचे म्हणणे आहे. कच्च्या तेलाचा वापर करणाऱ्या पेंट आणि टायर कंपन्यांच्या शेअर्सवरही या युद्धाचा परिणाम दिसून आला. एशियन पेंट्स आणि बर्जर पेंट्सचे शेअर्स 3-4% घसरले.

नोंद - क्रिप्टो मार्केट, शेअर मार्केट किंवा म्युच्युअल फंडातील गुंतवणुकीत जोखीम असते. यामध्ये फायद्याप्रमाणे नुकसान होण्याचीही शक्यता असते. त्यामुळे क्रिप्टो, शेअर बाजार किंवा म्युच्युअल फंडातील कोणतीही गुंतवणूक करण्याआधी आपल्या वित्तीय सल्लागारासोबत चर्चा करूनच गुंतवणूक करा.