सदू : दादूराया, समोर टाकीवर कोण चढलंय रे?
दादू : मी इथं तुझ्या शेजारी उभा आहे, त्याअर्थी तो मी नव्हेच !
सदू : हा विनोद होता?
दादू : नाही ! टोमणा होता !!
सदू : बरं ! मग टाकीवर कोण चढलं असेल?
दादू : धर्मेंद्र असावा !
सदू : कोण धर्मेंद्र?
दादू : ‘शोले’मधला वीरू !
सदू : मग बसंती कुठे आहे?
दादू : टाकीखाली उभी असेल !
सदू : टाकीखाली तर आपण आहोत !
दादू : तुझ्याकडे दुर्बीण आहे?
सदू : मला दूरदृष्टी आहे ! टाकीवरला कार्यकर्ता मला स्पष्ट दिसतोय ! दुर्बिणीची गरज काय?
दादू : दुर्बीण असलेली बरी ! वाघ लांबून येत असतानाच दिसतो !
सदू : ‘सदू आणि दादूनं एकत्र येऊन महाराष्ट्र सांभाळावा,’ असं तो टाकीवरला कार्यकर्ता म्हणतो आहे !!
दादू : वेडाच दिसतोय !
सदू : ‘आम्ही एकत्र येऊ’ असं आश्‍वासन आपण दोघांनी दिल्याशिवाय तो टाकीवरून उतरणार नाहीए म्हणे !
दादू : त्याला म्हणावं एव्हरेस्टवर जाऊन बस !
सदू : दादूराया, तुला काही हृदय आहे की नाही?
दादू : मी हिंदुहृदयसम्राट आहे !
सदू : एक बिचारा कार्यकर्ता आपल्या दोघा भावंडात एकोपा व्हावा म्हणून एवढी रिस्क घेतो, तुला काहीच का वाटत नाही?
दादू : तू सकाळी लौकर उठावंस म्हणून मी बांदऱ्याच्या टाकीवर कधी चढून बसलो होतो का?
सदू : तुला टाकीवर चढता येतं का?
दादू : एकदाच झाडावर चढलो होतो !
सदू : खोटं ! कुठे?
दादू : ताडोबाच्या जंगलात समोरून वाघ आला तेव्हा-
सदू : कार्यकर्त्यांच्या इच्छेचा मान राखणं हे आपलं कर्तव्य ठरतं !
दादू : मी तुला टाळी मागितली तेव्हा दिली नाहीस !
सदू : मी तुला तेवीस फोन केले तेव्हा तू कुठे उचललेस?
दादू : आपल्यात एकोपा साधण्यासाठी आजवर भलेभले टाकीवर चढले आहेत...गुमान खाली उतरले !!
सदू : आपण कधीच एकत्र येणार नाही, हे महाराष्ट्राला कधी कळेल?
दादू : फू: !!
सदू : मुळात कुणीतरी एकत्र यावं म्हणून एखाद्यानं असं उंचावर चढून धमकावणं योग्य आहे का? हा खरा प्रश्‍न आहे !!
दादू : हे इमोशनल ब्लॅकमेल आहे !! भावनेला हात घालून जनतेला मूर्ख बनवण्याचा हा प्रकार गेली चार वर्षे ह्या महाराष्ट्रात नव्हे, देशात चालू आहे !  ह्या कमळेनं सगळा गेम नासवला ! बघून घेईन !!
सदू : तूसुद्धा त्यातलाच आहेस, दादूराया ! एकीकडे कमळीला शिव्या देतोस आणि दुसरीकडे तिच्याशी गुलुगुलू बोलतोस ! म्हणतात ना- रात्री रातराणी, दिवसा केरसुणी !!
दादू : सद्या, तुला राजकारण कशाशी खातात, हेसुद्धा कळत नाही ! भांड्यातलं लोणी सरळ बोटानं काढता येत नाही ! कळलं?
सदू : त्या टाकीवरल्या कार्यकर्त्याला आपण खोटं खोटं आश्‍वासन देऊन खाली उतरवू या ! आणि खाली उतरल्यावर मग एकोप्यानं त्याच्या-
दादू : नको ! तो बांबू ठेव खाली !! त्याला ओरडून सांग की त्याच्या अकौंटमध्ये पंधरा लाख टाकण्यात आलेत ! झक्‍कत उतरेल !!
सदू : मला असं वाटतं की हा कार्यकर्ता मराठी जनतेचा प्रतिनिधी आहे !! आपण दोघे बसंती आहोत ! आणि आपल्यासाठी मराठी जनता टाकीवर नौटंकी करते आहे ! उतरली की उतरेल !! जय महाराष्ट्र !!
दादू : दे टाळी !