सातारा - खरीप हंगामातील कर्जवाटपाचा आढावा घेण्‍यासाठी आज जिल्हास्तरीय बँकर्स समितीची बैठक जिल्हाधिकारी शेखर सिंह यांच्या अध्यक्षतेखाली जिल्हाधिकारी कार्यालयात झाली. बैठकीत श्री. सिंह यांनी प्रत्येक बँक शाखानिहाय खरीप हंगामात शेतकऱ्यांना कर्जवाटपाचे उद्दिष्ट पूर्ण करण्‍याच्‍या सूचना केल्‍या.

सुरू होणाऱ्या खरीप हंगामात शेतकऱ्यांना देण्‍यात येणाऱ्या पीक कर्जाचा आढावा घेण्‍यासाठी या बैठकीचे आयोजन करण्‍यात आले होते. बैठकीला मुख्य कार्यकारी अधिकारी विनय गौडा, प्रभारी जिल्हा अधीक्षक कृषी अधिकारी विजयकुमार राऊत, जिल्हा पशुसंवर्धन उपायुक्त डॉ. अंकुश परिहार, नाबार्डचे जिल्हा विकास प्रबंधक राजेंद्र चौधरी, बँक ऑफ महाराष्ट्रचे प्रबंधक विवेक नाचणे, जिल्हा अग्रणी व्यवस्थापक युवराज पाटील यांच्यासह विविध बँकांचे प्रतिनिधी उपस्थित होते.

आढावा घेतल्‍यानंतर श्री. सिंह यांनी शेतकऱ्यांना खरीप हंगामात कर्जप्रकरणांमध्ये अडचणी येत असतील तर त्याची माहिती कृषी विभागाने घेऊन त्यांना सुलभरित्या कर्ज कसे मिळेल, यासाठी प्रयत्न करण्‍याच्‍या सूचना केल्‍या. याचदरम्‍यान त्‍यांनी लघु उद्योजकांची कर्ज रकमेची मोठी मागणी नसते. त्यांच्या मागणीनुसार जास्तीत जास्त लघु उद्योजकांची कर्जप्रकरणे मंजूर करण्‍याबरोबरच बचत गटांची कर्जप्रकरणेही जास्तीत जास्त मंजूर करावीत, अशा सूचनाही त्‍यांनी केल्‍या.