भिलार - शासनाने दिलेली पुनर्वसनातील हक्काची जमीन मूळ मालक देत नसल्याने रांजणी (ता. जावळी) येथील धरणग्रस्ताने आज सकाळी ११ वाजण्याच्या सुमारास बरडमध्ये (ता. फलटण) विष पिऊन आत्महत्या करण्याचा प्रयत्न केला. या प्रकाराने जावळी तालुक्यात एकच खळबळ उडाली आहे. विठ्ठल दगडू रांजणे असे या धरणग्रस्ताचे नाव असून, त्यांच्यावर साताऱ्यातील शासकीय रुग्णालयात उपचार सुरू असून, त्यांची प्रकृती चिंताजनक आहे.

याबाबत अधिक माहिती अशी, की महू धरणात बाधित असणाऱ्या रांजणी गावातील काही खातेदारांना अद्यापही जमिनींचा मोबदला मिळाला नाही. धरणाची वाटचाल पूर्णत्वाकडे चालली असताना या गावातील अनेकांना अद्यापही जमिनी ताब्यात मिळालेल्या नाहीत. विठ्ठल रांजणे यांना फलटण तालुक्यातील बरड येथे जमीन मिळाली असून, संबंधित जमीन रांजणे यांना ताब्यात देण्यास मूळ मालक नकार देत आहेत. रांजणे व त्यांचे कुटुंबीय आज सकाळी जमीन कसण्यासाठी गेले असताना त्यांना त्या ठिकाणी मूळ मालकांनी अडथळा आणत काठ्यांनी धाक दाखवत हाकलून देण्याचा प्रयत्न केला.

त्या वेळी रांजणे यांनी जागेवरच विष प्राशन करून आत्महत्येचा प्रयत्न केला. आपल्या वडिलोपार्जित जमिनी धरणासाठी देऊन त्यापोटी हक्काचा मोबदला असणारी जमिनीच जर मिळत नसेल तर जागून काय फायदा हा विचार करून रांजणे यांनी आत्महत्या करण्याचा प्रयत्न केला. त्यामुळे एकच खळबळ उडाली आहे. रांजणे यांच्यावर साताऱ्यातील जिल्हा शासकीय रुग्णालयात उपचार सुरू असून, त्यांची प्रकृती चिंताजनक आहे.