कऱ्हाड (जि. सातारा) : सोशल माध्यमावर महाविकास आघाडी सरकारसह मुख्यमंत्री उद्धव ठाकरे यांची बदनामी केल्याप्रकरणी दोघांवर तालुका पोलिसात सायंकाळी उशिरा गुन्हा दाखल झाला. विद्यार्थी राष्ट्रवादी काँग्रेसचे जिल्हा संघटक अक्षय शिंदे यांनी त्याची तक्रार दिली आहे. 

आकाश ठाकूर (रा. अमरावती) व रणजीतसिंग राणा अशी या प्रकरणी गुन्हा दाखल झालेल्यांची नावे आहेत. पोलिसांनी दिलेली माहिती अशी, तालुक्यातील सुपने येथील अक्षय शिंदे राष्ट्रवादीच्या विद्यार्थी संघटनेचे जिल्हा संघटक आहेत. सचिन कुर्‍हाडे पक्षाच्या सोशल माध्यम सेलचे जिल्ह्याचे काम पाहतात. सोशल माध्यमावर मुख्यमंत्री उद्धव ठाकरे, राष्ट्रवादीचे अध्यक्ष शरद पवार यांच्यासह महाविकास आघाडी सरकारची बदनामी होईल, अशा आशयाच्या पोस्ट व फोटो 12, 15, 16 आणि 19 ऑक्टोबर रोजी टाकले होते. अक्षय यांच्या ते निदर्शनास आले. 

राजकारणात मोठी घडामोड! कऱ्हाडात कट्टर विरोधक येणार एका व्यासपीठावर

त्यांनी राष्ट्रवादीच्या सोशल मीडिया सेलचे जिल्हाध्यक्ष सचिन कुर्‍हाडे यांच्याकडून माहिती घेतली. संबंधित सोशल माध्यमाचा ग्रुप अमरावतीच्या आकाश ठाकूर (रा. अमरावती) यांनी केला आहे, असे स्पष्ट झाले. त्याबाबत अक्षय शिंदे यांनी आकाश ठाकूर व रणजीतसिंग राणा यांच्याविरोधात तालुका पोलिसात तक्रार दिली आहे. त्यावरून गुन्हा दाखल झाला आहे. फौजदार गणेश कड तपास करीत आहेत.

संपादन : बाळकृष्ण मधाळे