पिंपोडे बुद्रुक (जि. सातारा) : कोरोनाचा वाढता प्रादुर्भाव शहरी भागासोबतच ग्रामीण भागाची चिंता वाढवत आहे. त्यामुळे ग्रामीण भागातील व्यावसायिकांवर गेल्या वर्षीप्रमाणे यंदाही संक्रांत आली आहे. सोमवारपासून नव्याने जाहीर झालेल्या वीक एंड लॉकडाउनमुळे व्यापारी धास्तावले असून, ऐन हंगामात अर्थचक्र ठप्प झाले आहे. हातावरचे पोट असलेल्यांनी जगायचे कसे? कुटुंबाचा उदरनिर्वाह कसा करायचा? पुढे काय होईल? अशी विवंचना सर्वांना पडली आहे. 

वर्षापूर्वी आलेल्या कोरोना संकटाने तब्बल सहा महिन्यांचा प्रदीर्घ लॉकडाउन झाला. त्याचा असंघटित क्षेत्रातील सर्वच घटकांवर विपरीत परिणाम झाला. रुग्णसंख्या कमी झाल्यानंतर काही महिने लॉकडाउन शिथिल झाला होता. आता कुठे कष्टकऱ्यांच्या हाताला काम मिळू लागले होते. चार पैसे हातात खुळखुळू लागल्याने बाजारपेठांत नवचैतन्य आले होते. व्यवसायाची बिघडलेली घडी पुन्हा रुळावर यायला लागली होती. अशातच रविवारी राज्य सरकारने मिनी लॉकडाउन जाहीर केला आणि सर्वसामान्यांचे कंबरडेच मोडले.

फोटो काढून फेसबुकवर मिरवण्याशिवाय नगराध्यक्षांनी काहीच काम केलेले नाही


वर्षभर मंदी असल्याने हातावरची शिल्लक कधीच संपली होती. बहुतांश जणांनी कर्ज काढून उद्योगधंदे सुरू ठेवलेत. मात्र, आता सलग दुसरे वर्ष आर्थिक फटका कसा सोसायचा? हाच खरा प्रश्न आहे. उन्हाळा असल्याने यात्रा, लग्नसराई तसेच पर्यटनाचा उद्योग बहरतो. त्यातून अनेकांना रोजगार मिळतो. या काळातील कमाईवर पावसाळा आणि हिवाळ्याचा खर्च निघतो. मात्र, लॉकडाउनमुळे अर्थहंगाम कोरडा जाणार असून, संपूर्ण वर्ष कसे काढायचे, याची काळजी अनेकांना सतावत आहे. निर्बंध कडक करा, कायदा मोडणाराला शासन करा, परंतु टाळेबंदी करू नका, अशी आर्त विनवणी प्रशासनाला केली जात आहे. 

कोरोनाला प्रतिबंध करताना शासनाने केलेला लॉकडाउन शिथिल करावा. कडक निर्बंध करून कायदेशीर कारवाई करा. पण, दुकानांची टाळेबंदी करू नका. अन्यथा आमच्यासारख्या नवीन व्यावसायिकांचे अतोनात नुकसान होईल.

-निखिल लेंभे, हॉटेल व्यावसायिक 

कोरोनाचे संकट जायचे नाव घेत नसल्याने व्यावसायिकांनी जगायचे कसे? लॉकडाउन काळात शासनाने आम्हाला आर्थिक मदत करावी.

-तेजस केंजळे, केटरिंग व्यावसायिक 
 

महाबळेश्‍वरच्या पंचायत समितीच्या सभापतिपदी राजपुरेंना संधी?

Edited By : Siddharth Latkar