महाबळेश्वर : महाबळेश्वरच्या मुख्य बाजारपेठेतील भिसे कुटुंबीयांच्या जुन्या 80 फूट खोल अरुंद विहिरीमध्ये मोकाट कुत्रे पडले. या कुत्र्याला महाबळेश्वर ट्रेकर्सचे जवान व प्राणीमित्रांनी तीन तासांच्या अथक प्रयत्नांनी सुखरूप बाहेर काढत जीवदान दिले. मुख्य बाजारपेठेच्या मध्यवर्ती ठिकाणी बाजारपेठ व मशीद रस्त्याला जोडणाऱ्या बोळामध्ये भिसे कुटुंबीयांची एक ब्रिटिशकालीन विहीर असून, 80 फूट खोल व अरुंद असलेल्या या विहिरीमध्ये मोकाट कुत्रे पडले.

विहिरीमधून कुत्र्याचा भुंकण्याचा आवाज आल्याने भिसे कुटुंबीयांनी याबाबतची माहिती महाबळेश्वर ट्रेकर्सचे जवान सुनील भाटिया यांना दिल्यानंतर तातडीने महाबळेश्वर ट्रेकर्सचे जवान घटनास्थळी दाखल होत मदतकार्यास सुरुवात करण्यात आली. विहीर जुनाट असल्याने खोल विहिरीत उतरणे जिकिरीचे होते. मात्र, महाबळेश्वर ट्रेकर्सच्या जवानांनी खोल विहिरीत उतरण्याचा निर्णय घेतला. ट्रेकर्स टीमचे सनी बावळेकर यांनी दोरखंडाच्या साहाय्याने 80 फूट खोल विहिरीत लीलया उतरून प्राणिमात्रांच्या सहकार्याने या जखमी कुत्र्यास सुखरूप विहिरीबाहेर काढत जीवदान दिले.

उमेदवार असूनही मतदानापासून वंचित; बिग बाॅस फेम अभिजीत बिचुकले संतापले 

या कुत्र्याची काळजी भाटिया कुटुंबीयांनी घेतली. खाऊ घालून सकाळी सोडून दिले. विहिरीतून कुत्रे बाहेर काढण्याची मोहीम तब्बल तीन तास सुरू होती. मोहिमेत ट्रेकर्सचे जवान व प्राणिमित्र सनी बावळेकर, सुनील भाटिया, प्रवीण जिमन, संदेश भिसे, सचिन गुजर, राजा गुजर, आकाश ढेबे, संदीप सपकाळ, अक्षय माने, रोहित गोळे, सुमित पाटील, सिद्धू ननावरे, संतोष वाडकर, मोहन धनावडे, यश तांबे, शुभम कुंभारदरे आदींनी सहभाग घेतला.

Edited By : Siddharth Latkar