कोरेगाव (सातारा) : ईडीला (ED) पळवणारे आमच्यासारखे कार्यकर्ते आहेत. ईडी आणि ईडीच्या बापालाही आम्ही घाबरत नाही, काही दिवसांपूर्वी भाजपचे सोमय्या कोरेगाव परिसरात येऊन गेले. त्यावेळी त्यांचा तोतरेपणा बाहेर काढण्याची परवानगी मी आमच्या पक्षाच्या वरिष्ठांकडे मागितली होती, अशा शब्दांत राष्ट्रवादीचे आमदार शशिकांत शिंदे (MLA Shashikant Shinde) यांनी ईडीला आणि किरीट सोमय्या (Kirit Somaiya) यांना आव्हान दिलंय.

आमदार शशिकांत शिंदे यांच्या वाढदिवसानिमित्त कटापूर (ता. कोरेगाव) येथे झालेल्या कार्यकर्त्यांच्या मेळाव्यात ते बोलत होते. यावेळी कोरेगाव मतदारसंघ राष्ट्रवादीच्या वतीने आदर्श कोरोना योद्धा व आदर्श आमदार म्हणून पारनेरचे राष्ट्रवादीचे आमदार निलेश लंके यांचा विशेष सन्मान करण्यात आला.

दरम्यान, भाजपनं मला शंभर कोटींची ऑफर दिली होती, या दाव्याचा पुनरूच्चार करून आमदार शिंदे म्हणाले, "विधानसभेच्या गेल्या निवडणुकीच्या अगोदर भाजपनं मला शंभर कोटींची ऑफर दिली होती; परंतु ती ऑफर मी धुडकावून लावली होती. आमची निष्ठा आमचे नेते शरद पवार व 'राष्ट्रवादी'शी आहे. त्यामुळे मी कधीही शरद पवार यांची साथ सोडणार नाही, असंही त्यांनी नमूद केलं.