Satara Political News : सातारा नगरपालिकेचा (Satara Municipal Election) 5 वर्षांचा कार्यकाळ संपला असल्याकारणानं आता नगरपालिका निवडणुकीसाठी येत्या काही दिवसांत बिगूल वाजणार आहे. मात्र, येऊ घातलेल्या निवडणुकीत साताऱ्यात मोठा पेच उभा राहण्याची शक्यता निर्माण झाल्याचं पाहायला मिळतंय.

सातारा नगरपालिकेवर सध्या उदयनराजे भोसले यांच्या सातारा विकास आघाडीची सत्ता होती. तर, त्यांचे बंधू शिवेंद्रराजे भोसले यांची नगरविकास आघाडी विरोधी बाकावर पाहायला मिळाली. मात्र, आता दोन्ही राजे भाजपच्या गोटात आहेत. यामुळं आता नक्की निवडणूक होणार कशी आणि कोणत्या चिन्हावर होणार, हा प्रश्न आहे. त्यातच आता शिवेंद्रसिंहराजेंनी (Shivendraraj Bhosale) उदयनराजेंवर (Udayanraje Bhosale) टीका करत आतापासूनच त्यांना घेरण्यास सुरुवात केलीय.

पालिका निवडणूक जशी जवळ येईल, तशी सातारकरांना मिठ्या मारणं, पप्प्या घेणं असे प्रकार पुन्हा पहायला मिळणार आहेत. त्यावेळी सातारकरांना आम्ही कशी पालिका चांगली चालवली हे सांगतील आणि पुन्हा निवडून द्या म्हणतील. परंतु, सध्याच्या मूलभूत प्रश्नांकडं जाणीवपूर्वक सातारा विकास आघाडी आणि त्यांचे नेते लक्ष देत नसल्याची टीका आमदार शिवेंद्रराजे भोसले यांनी खासदार उदयनराजे भोसले यांच्यावर केली. येथील जिल्हाधिकारी कार्यालयाच्या आवारात आमदार शिवेंद्रराजे माध्यमांशी संवाद साधत होते. त्यावेळी त्यांनी उदयनराजेंना टोमणा लगावला. यावेळी त्यांनी साताऱ्याच्या मूलभूत प्रश्नांवरही भाष्य केलं.