कराड : सातारा बाजार समिती इमारतीच्या भूमिपूजनावरून काल साताऱ्यात झालेल्या राड्याप्रकरणी खासदार उदयनराजे भोसले व आमदार शिवेंद्रसिंहराजे भोसले (Shivendraraje Bhosale) एकमेकांसमोर आले होते. त्यामुळे वातावरण तंग झाले होते.

दरम्यान, उपमुख्यमंत्री देवेंद्र फडणवीस (Devendra Fadnavis) काल बुधवारपासून कराड दौऱ्यावर आहेत. खासदार उदयनराजे आणि आमदार शिवेंद्रसिंहराजे भोसले यांनी उपमुख्यमंत्री फडणवीस कराड येथे येऊन त्यांची स्वतंत्रपणे भेट घेतली.

सुमारे तासभर स्वतंत्ररित्या झालेल्या या चर्चेत सातारा येथील राड्याची चर्चा झाल्याचे खात्रीशीर वृत्त आहे. त्यावर उपमुख्यमंत्री फडणवीस काय निर्णय घेतात याकडे सर्वांचे लक्ष लागून राहिले आहे.

सातारा कृषी उत्पन्न बाजार समितीच्या नूतन इमारतीची जागा माझी आहे, असे म्हणत काल बुधवारी खासदार उदयनराजे यांनी न्यायालयाचा अवमान होऊ नये याची खबरदारी पोलिसांनी घ्यावी, असे आवाहन पोलिसांना करत खिंडवाडीत भूमिपूजनाच्या ठिकाणी थांबून राहिले.

दरम्यानच्या काळात शिवेंद्रसिंहराजे घटनास्थळी पोहचले. त्यांनी जागा मार्केट कमिटीच्या नावावर असल्याचे सांगत उदयनराजे आणि पोलिसांच्या समोरच कार्यक्रमस्थळी नारळ फोडत नूतन इमारतीच्या भूमिपूजनाचा सोहळा पार पडून निघून गेले.

यानंतर खासदार भोसले यांनी घटनास्थळी त्यांच्या समर्थकांसमवेत विविध विकासकामांचे भूमिपूजन केले. त्यानंतर उदयनराजे यांनी संभाजीनगर ग्रामपंचायतमधील ग्रामस्थांना विविध विकासकामांसाठी जागा नाही. त्यासाठी त्यांनी आम्हाला या जागेची मागणी केली.

त्या जागेत संभाजीनगर ग्रामपंचायतीसाठीच्या विविध विकास कामांसाठीचे भूमिपूजन केले. सातारा येथील भूमिपूजनाच्या कार्यक्रमावरून झालेल्या राड्यानंतर उपमुख्यमंत्री फडणवीस यांच्या भेटीला दोन्ही राजे कराडमध्ये दाखल झाले आहेत.

खासदार भोसले व आमदार भोसले यांनी स्वतंत्ररित्या उपमुख्यमंत्री फडणवीस यांची भेट घेऊन त्यांना कालच्या राड्याची माहिती दिल्याचे समजते. या राडा प्रकरणावर उपमुख्यमंत्री फडणवीस काय निर्णय घेणार याकडे सर्वांचे लक्ष लागले आहे.