फलटण शहर (जि. सातारा) : अवैधपणे उत्खनन केलेली दोन लाख 40 हजार रुपयांची वाळू मिश्रित माती चोरून नेल्याप्रकरणी व जप्त केलेली वाहने ताब्यात घेण्यास अटकाव करून शासकीय कर्मचाऱ्यांना धमकी देऊन शासकीय कामात अडथळा आणल्याप्रकरणी साखरवाडी (ता. फलटण) येथील राष्ट्रवादी कॉंग्रेसचे (nationalist congress party) फलटण तालुकाध्यक्ष सतीश माने यांच्यासह तिघांविरुद्ध फलटण ग्रामीण पोलिस ठाण्यात (phaltan rural police) गुन्हा नोंद झाला आहे. ncp phaltan taluka president satara crime news

याबाबतची माहिती अशी, की 16 एप्रिल रोजी रात्री साडेअकरा वाजण्याच्या सुमारास होळ (ता. फलटण) येथील शेती महामंडळाच्या खंडाने घेतलेल्या जमिनीत वाळू मिश्रित मातीचे उत्खनन सुरू असल्याची माहिती प्रांताधिकारी शिवाजीराव जगताप यांना मिळाली. तेव्हा त्यांनी होळ येथील मंडलाधिकारी भांगे व होळ व पिंपळवाडी येथील तलाठी सुभाष गवळी यांना माहिती देऊन संबंधित ठिकाणी जाऊन छापा मारून कारवाई करण्यास सांगितले.

त्या वेळी मंडलाधिकारी भांगे, तलाठी गवळी, कोतवाल सतीश धायगुडे व चालक बाळासाहेब भिसे यांनी होळ येथील शेती महामंडळाच्या गट नंबर 274 जमिनीत छापा मारला. त्या वेळी तेथे वाळू मिश्रित मातीचे उत्खनन सुरू होते. कर्मचाऱ्यांची चाहूल लागताच तेथील एक ट्रॅक्‍टर भरलेल्या वाळूसह ट्रॉलीसह पळून गेला. तेथील पोकलेन मशिनचा ऑपरेटरही पळून गेला. यानंतर पोकलेनवर नमूद असलेल्या मोबाईल नंबरवर संपर्क साधला असता तो नंबर सतीश माने (रा. साखरवाडी) यांचा असल्याचे निदर्शनास आले. त्यांना पोकलेनबाबत विचारणा केली असता तो त्यांनी आपले बंधू राजेंद्र माने यांचा असल्याचे सांगितले.

सातारा जिल्ह्यातील बातम्या वाचा

संबंधित ठिकाणी आम्ही शेत तळ्याचे काम करीत असल्याचेही सांगितले. या ठिकाणी वाळू मिश्रित माती काढण्याची व वाहतुकीची परवानगीबाबत विचारले असता माने यांनी काहीही सांगितले नाही. त्यानंतर तेथे उत्खनन केलेल्या जमिनीचा पंचनामा करून पोकलेन फलटण तहसील कार्यालय येथे नेण्याची तयारी करीत असताना सतीश माने यांनी मंडलाधिकारी व तलाठ्यांना तसे करण्यास अटकाव केला. वारंवार धमकी देऊन शासकीय कामात अडथळा आणला. याबाबत तलाठी सुभाष गवळी यांनी फिर्याद नोंदविली आहे. त्यावरून माने यांच्याविरुद्ध दोन लाख 40 हजार रुपयांची 120 ब्रास वाळू चोरून नेल्याचा व शासकीय कामात अडथळा आणल्याचा, तसेच ट्रॅक्‍टरचालक व पोकलेन ऑपरेटर यांच्या विरुद्धही फलटण ग्रामीण पोलिस ठाण्यात गुन्हा नोंद झाला आहे.