फलटण शहर: फलटण नगरपालिकेकडून मेटकरी गल्लीत होत असलेल्या कृत्रिम पाणी टंचाईविरोधात वारंवार निवेदने देऊनही प्रशासन ढिम्मच राहिल्याने आज गुढीपाडव्याच्या दिवशी व रमजान रोजेच्या पार्श्वभूमीवर मुस्लिम समाजातील संतप्त महिलांनी फलटण नगरपालिकेच्या मुख्य प्रवेशद्वारासमोरच मोकळे हंडे घेऊन धरणे आंदोलन केले.

फलटण नगरपालिकेच्या नूतन इमारतीपासून केवळ काही फूट अंतरावर मेटकरी गल्लीत असलेल्या काही घरांना गेली चार वर्षे कृत्रिम पाणीटंचाईस सामोरे जावे लागत आहे. या कालावधीत संबंधितांनी अनेकदा तोंडी व लेखी तक्रारी केल्या; परंतु प्रशासनाकडून कोणत्याही हालचाली झाल्या नाहीत. याप्रकरणी १५ दिवसांपूर्वी मुख्याधिकारी संजय गायकवाड यांची भेट घेत महिलांनी संतप्त भावना व्यक्त करत गुढीपाडव्यादिवशीच आंदोलन करू, असा इशाराही दिला होता. तेव्हा रमजानच्या रोजेंच्या पार्श्वभूमीवर पाण्याची तक्रार येऊ देणार नाही, पाणीपुरवठा सुरळीत करू, अशी ग्वाही संजय गायकवाड यांनी दिल्याने हंड्यासह आलेल्या महिला मुख्याधिकाऱ्यांच्या शब्दावर विश्वास ठेऊन परत गेल्या होत्या; परंतु १५ दिवस उलटून गेल्यानंतरही तीच परिस्थिती राहिल्याने आज मुस्लिम महिलांनी पालिकेच्या प्रवेशद्वारावरच रिकामे हंडे व भांडी घेऊन धरणे आंदोलनास प्रारंभ केला.

संतप्त महिलांनी ऐन पाडव्याच्या दिवशीच घेतलेल्या आंदोलनाच्या पवित्र्याने अधिकाऱ्यांची चांगलीच धावपळ उडाली. मुख्याधिकारी, पाणीपुरवठा विभागाचे प्रमुख विनोद जाधव यांनी आंदोलकांशी चर्चा केली. त्यानंतर संतप्त महिलांनी मुख्याधिकाऱ्यांच्या शब्दावर विश्वास ठेवत आंदोलन मागे घेतले.