सातारा : जिल्हा मध्यवर्ती सहकारी बॅंकेच्या वार्षिक सर्वसाधारण सभेत आमदार रामराजे नाईक- निंबाळकर (Ramraje Naik- Nimbalkar) व खासदार उदयनराजे भोसले एकमेकांच्या शेजारी बसून हास्यविनोदात रमल्याचे पाहायला मिळाले. त्यामुळे अनेकांच्या भुवया उंचावल्या, तर काहींचे चेहरे पडले होते.

फलटण आणि साताऱ्याच्या राजेंमध्ये (Udayanraje Bhosale) दिलजमाई कधी झाली, असा प्रश्न सर्वांच्या चेहऱ्यावर जाणवत होता. जिल्ह्यात काल राष्ट्रवादीचे अध्यक्ष खासदार शरद पवार यांची दहिवडीत सभा होती. या वेळी पत्रकारांशी बोलताना आमदार शशिकांत शिंदेंनी रामराजे नाईक- निंबाळकर व खासदार रणजितसिंह निंबाळकर यांना अप्रत्यक्ष इशारा दिला.

परिवर्तनाची सुरुवात फलटणमधून होणार असल्याचे सांगत त्यांनी दोन्ही निंबाळकरांना आव्हान दिले. याची चर्चा सुरू असतानाच आज दुपारी सातारा जिल्हा बॅंकेची वार्षिक सर्वसाधारण सभा झाली. या सभेसाठी सभागृहात जाताना ज्येष्ठ संचालक रामराजे नाईक-निंबाळकर व खासदार उदयनराजे भोसले दोघे एकाच लिफ्टमधून खालच्या मजल्यावर गेले.

तसेच व्यासपीठावरही हे दोघे एकमेकांच्या शेजारी बसले, तसेच हास्यविनोदातही रमले होते. त्यामुळे अनेकांच्या भुवया उंचावल्या गेल्या. काहींचे चेहरे पडले होते. या दोघांतील वाद आणि त्यातून त्यांनी एकमेकांना शासकीय विश्रामगृहात दिलेले आव्हान संपूर्ण जिल्ह्याला माहीत आहे.

पण आता हा वाद मिटला. दोघांत दिलजमाई झाली, हेच यातून जाणवत आहे. याबाबत दोघांनीही आपल्या भाषणात आमच्या संचालकांत मतभेद आहेत; पण बॅंकेत आम्ही कधी राजकारण केलेले नाही. त्यामुळे बॅंकेचा देशपातळीवर गौरव झाला आहे, असे स्पष्ट केले.