फलटण (जि. सातारा) ः कुरवली खुर्द (ता. फलटण) गावच्या हद्दीतील बाणगंगा धरणात बेकायदा वाळूची चोरी करून ट्रॉली, टेंपोमध्ये भरताना सापडल्यामुळे फलटण ग्रामीण पोलिस ठाण्यात आठ जणांविरोधात गुन्हा नोंद करण्यात आला असून, घटनास्थळावरून पोलिसांनी 14 लाख 23 हजारांचा मुद्देमाल जप्त केला आहे. 

पोलिस अधीक्षक तेजस्वी सातपुते, अप्पर पोलिस अधीक्षक धीरज पाटील यांनी अवैध वाळूउपसा व चोरटी वाळूवाहतूक करणाऱ्यांवर कारवाई करण्याच्या सूचना स्थानिक गुन्हे शाखेचे पोलिस निरीक्षक सर्जेराव पाटील यांना दिल्या होत्या. अप्पर पोलिस अधीक्षक श्री. पाटील यांनी सहायक पोलिस निरीक्षक आनंदसिंग साबळे यांच्या अधिपत्याखाली पथक तयार करून कारवाईच्या सूचना केल्या होत्या.

दरम्यान, सोमवारी (ता. एक) सर्जेराव पाटील यांना मिळालेल्या बातमीनुसार स्थानिक गुन्हे शाखेच्या पथकाने दुपारी 12 च्या सुमारास कुरवली खुर्द येथील बाणगंगा धरणाच्या पात्रात अचानक छापा टाकला असता त्याठिकाणी अनिल बबन पवार (रा. जिंती नाका, ता. फलटण), आदेश जालिंदर जाधव (रा. वाठार निंबळाकर, ता. फलटण), विनोद रामभाऊ मदने (रा. धुळदेव, ता. फलटण), सुखदेव हिरालाल जाधव (रा. जिंती नाका, ता. फलटण), वैभव संजय निंबाळकर (रा. चिंचुर्णी, ता. फलटण), मालोजी ऊर्फ पप्पू बाळू जाधव (रा. जाधववाडी, ता. फलटण), नवनाथ ज्ञानेश्वर भंडलकर (रा. तावडी, ता. फलटण), तानाजी जाधव (रा. धुळदेव, ता. फलटण) हे आठ जण सहा ट्रॅक्‍टर ट्रॉली व एक 709 टेंपोच्या साह्याने वाळू उत्खनन करून तिची चोरटी वाहतूक करताना आढळून आले.

वाळूबाबत त्यांच्याकडे चौकशी केली असता ते सर्वजण बेकायदेशीर वाळूची चोरी करीत असल्याचे आढळून आल्यानंतर त्यांच्याविरोधात फलटण ग्रामीण पोलिस ठाण्यात गुन्हा दाखल करण्यात आला आहे. वाळू चोरांकडून 14 लाख 23 हजार रुपयांचा मुद्देमाल हस्तगत करण्यात आला. त्यात वाहने आणि वाळूचा समावेश आहे.