ओगलेवाडी (जि. सातारा) : हजारमाची (ता. कऱ्हाड) ग्रामपंचायतीच्या माध्यमातून गावात गटातटांचे राजकारण न करता सर्वांना बरोबर घेऊन त्यांच्या सहकार्यातून गेल्या पाच वर्षांत सुमारे पाच कोटी रुपयांच्यावर खर्चाची विविध विकासकामे केली आहेत. अत्याधुनिक ग्रामसचिवालय, चिल्ड्रन पार्क, सदाशिवगड पर्यटन केंद्र आदी विविध विकासकामे नजीकच्या काळात साकारली जाणार आहेत. जिल्ह्यात हजारमाची आदर्श व स्वच्छ गाव करण्याचा निर्धार असल्याचे सरपंच लता काटवटे व उपसरपंच सुजाता डुबल यांनी पत्रकार परिषदेत सांगितले. 

हजारमाची ग्रामपंचायतीचा कार्यकाल संपला असल्याने कारभार सध्या प्रशासनाकडे सोपवला आहे. ग्रामपंचायतीच्या माध्यमातून राबवण्यात आलेल्या योजना व केलेली विकासकामे यांची माहिती देण्यासाठी पत्रकार परिषदेचे आयोजन केले होते. या वेळी माजी सरपंच प्रतिभा लिमकर, सूर्यभान माने, सतीश पवार, निवासराव डुबल, दीपक लिमकर, ग्रामपंचायतीचे सदस्य उपस्थित होते. ग्रामपंचायतीत निम्म्यापेक्षा अधिक महिला सदस्य होत्या. सरपंचपदीही महिला होत्या. महिलाराज असूनही आम्ही गावात एकजुटीने भरीव काम करून दाखवले. निष्कलंक कारभार केला, असेही सरपंच काटवटे यांनी सांगितले. 

प्लॅस्टिक, थर्माकॉल ठरतेय स्वच्छतेत बाधा; कऱ्हाडला ठोस उपायांची गरज

पंचायत समितीचे माजी सदस्य दीपक लिमकर व सतीश पवार यांनी माहिती देताना सांगितले, की गावात स्वच्छ पाणीपुरवठा करून आरोग्याची काळजी घेत आहोत. गॅस क्‍लोरिफिकेशन प्रणालीद्वारे पाणी शुद्ध करून कचऱ्यापासून गांडूळ खतनिर्मिती, सहा प्रभागांत रस्ते, वीज गटारे आदी विकासकामांना प्राधान्य दिले. वृक्षारोपण, निराधार महिलांना शिवणयंत्रे, दिव्यागांना आर्थिक साहाय्य, अंगणवाड्यांना गॅस कनेक्‍शन, विद्यार्थ्यांना ई लर्निंगसाठी एलईडी संचाचे वाटप, महिला मेळावे, सर्वरोग निदान शिबिरे, तसेच शासनाच्या विविध योजना ग्रामपंचायतीद्वारे तळागाळातील सामान्य नागरिकांपर्यंत पोचवल्या. 

संपादन : बाळकृष्ण मधाळे