नागठाणे : सुटीनिमित्त आसनगाव ता. सातारा येथे गावी आलेल्या सैनिकाच्या बँक खात्यातून परस्पर पैसे काढून घेण्याचा खळबळजनक प्रकार गुरुवारी घडला. त्यात अनोळखी व्यक्तीने बँक खात्यातील साडेसात लाख रुपये काढले. या प्रकरणी बोरगाव पोलिस ठाण्यात फसवणुकीचा गुन्हा दाखल झाला आहे.पोलिसांकडून मिळालेल्या माहितीनुसार, प्रमोद शंकर पवार (वय २३) या सैनिकाचे नाव आहे. प्रमोद पवार हे तीन वर्षांपासून भारतीय सैन्य दलात कार्यरत आहेत. सध्या ते अरुणाचल प्रदेश येथे कर्तव्य बजावीत आहेत.

आसनगाव येथे घर बांधावयाचे असल्यामुळे ते सध्या सुटीवर गावी आले आहेत. घर बांधण्यासाठी त्यांनी स्टेट बँक ऑफ इंडियाच्या प्रतापगंज शाखेतून ११ लाख रुपयांचे वैयक्तिक कर्ज घेतले होते. त्यापैकी दीड लाख रुपये बांधकाम व्यावसायिकाला दिले. दोन लाख रुपये दुसऱ्या बँकेच्या कर्जापोटी भरले. त्यांच्या खात्यात साडेसात लाख रुपये शिल्लक होते.

गुरुवारी सकाळी ते घरी असताना क्रेडिट कार्डपोटी २८ हजार रुपये कपात झाल्याचा मेसेज त्यांच्या मोबाईलवर आला. याबाबत अधिक चौकशी करण्यासाठी त्यांनी स्टेट बँक ऑफ इंडियाच्या कस्टमर केअरला फोन केला असता त्यांना एक ॲप्लिकेशन डाऊनलोड करण्यास सांगण्यात आले. त्यांनी ॲप्लिकेशन डाऊनलोड केल्यानंतर त्यांना बँकेचा खाते क्रमांक विचारण्यात आला. तो सांगितल्यावर पाच मिनिटांतच त्यांच्या मोबाईलवर कपातीचे मेसेज पडले.

या वेळी अनोळखी व्यक्तीने त्यांच्या खात्यातून काही मिनिटांतच टप्प्याटप्प्याने साडेसात लाख रुपये काढून घेतले. पैसे कपात केल्याचे लक्षात येताच त्यांनी सातारा सायबर सेलकडे धाव घेत माहिती दिली. या वेळी त्यांचे पैसे हे कर्नाटका बँकेच्या खात्यात वर्ग झाल्याचे सांगण्यात आले. प्रमोद पवार यांनी सातारा येथील कर्नाटका बँकेशी संपर्क साधला. तेथे त्यांना पैसे तेथूनही दुसऱ्या खात्यात वर्ग झाल्याची माहिती मिळाली. आपली फसवणूक झाल्याचे त्यांच्या लक्षात आले. त्यांनी शुक्रवारी सायंकाळी बोरगाव पोलिस ठाण्यात फसवणुकीचा गुन्हा दाखल केला. पुढील तपास पोलिस उपनिरीक्षक वर्षा डाळिंबकर करत आहेत.