सातारा : जिल्हा बँकेच्या वाटचालीत योगदान देणाऱ्यांनाच सभासदांनी यावेळेस मतदान करावे. केवळ जागा अडविण्यासाठी आणि सातारा जिल्हा बँक ही देशातील सहकारातील मोठी संस्था आहे, म्हणून मला तेथे गेले पाहिजे, यासाठी मागील वेळी दबाव टाकून संचालक झालेल्यांना आता घरी बसविण्याची वेळ आलेली आहे, अशी टीका भारतीय जनता पक्षाचे आमदार शिवेंद्रसिंहराजे भोसले यांनी खासदार उदयनराजेंचा नामोल्लेख टाळून केली.

जिल्हा मध्यवर्ती सहकारी बँकेच्या निवडणुकीसाठी उमेदवारी अर्ज दाखल करण्याच्या आजच्या अखेरच्या दिवशी सर्वच दिग्गज नेत्यांनी अर्ज दाखल केले आहेत. राष्ट्रवादी काँग्रेसच्या सर्वसमावेशक पॅनेलमध्ये सहभागी असलेले आमदार शिवेंद्रसिंहराजे भोसले यांनीही आज अर्ज दाखल केला. त्यापूर्वी त्यांच्याशी ‘सुरुची’ या त्यांच्या निवासस्थानी पत्रकारांनी संवाद साधला. त्यावेळी आमदार म्हणाले, ‘‘गेली पाच वर्षे सातारा जिल्हा बँकेत भाऊसाहेब महाराजांच्यानंतर संचालक व अध्यक्ष म्हणून मला काम करण्याची संधी मिळाली आहे. गेली पाच वर्षे बँकेचे कामकाज चांगल्या प्रकारे चालले. देशात व राज्यात बँक कायम एक नंबरला राहिली आहे. यावेळच्या निवडणुकीत सभापती रामराजे नाईक-निंबाळकर, सहकारमंत्री व पालकमंत्री बाळासाहेब पाटील, तसेच आमदार मकरंद पाटील, शशिकांत शिंदे असे मिळून पॅनेल होत आहे.

त्यामुळे बँकेच्या सभासदांच्या विश्वासावर आमच्या पॅनेलचा विजय होणार आहे. कोणी किती टीका, टिप्पणी करू देत, कोणी काहीही करू देत, काहीही फरक पडणार नाही. राष्ट्रवादीच्या सर्वसमावेशक पॅनेलचा विजय होणार आहे.’’ बँकेच्या वाटचालीत योगदान देणाऱ्यांनाच यावेळी सभासदांनी मतदान करावे, असे आवाहन करून शिवेंद्रसिंहराजे म्हणाले, ‘‘केवळ जागा अडविण्यासाठी आणि जिल्हा बँक देशातील सहकारातील मोठी संस्था आहे, म्हणून मला तेथे गेले पाहिजे, यासाठी मागील वेळी दबाव टाकून संचालक झालेल्यांना आता घरी बसविण्याची वेळ आलेली आहे, अशी टीका त्यांनी उदयनराजेंचा नामोल्लेख टाळून केली.

उदयनराजेंचा निर्णय शरद पवार घेणार

सर्व इच्छुकांना अर्ज दाखल करण्यास नेत्यांनी सांगितले होते. त्याप्रमाणे अर्ज दाखल झाले आहेत. एकदा जागा वाटप झाल्यानंतर त्या- त्या तालुक्यातील कोणाचे अर्ज ठेवायचे, कोणाचे मागे घ्यायचे, याबाबत निर्णय होईल, असेही शिवेंद्रसिंहराजे यांनी स्पष्ट केले. उदयनराजेंना घेऊन पॅनेल होणार काय, या प्रश्नावर शिवेंद्रसिंहराजे म्हणाले, ‘‘उदयनराजेंचा निर्णय खासदार शरद पवार, उपमुख्यमंत्री अजित पवार आणि सभापती रामराजे नाईक-निंबाळकर हे करतील. मी त्यांचा निर्णय करण्याचा प्रश्नच येत नाही.’’