अंगापूर- भूलथापा देऊन, फसवणूक करून निवडून येणाऱ्यांना जनतेने वेळीच धडा देत घरी बसविले. केवळ लोकांची दिशाभूल करून निवडून येता येते; पण शाश्वत विकास करता येत नाही, असे मत कोरेगावचे आमदार महेश शिंदे यांनी निगडी वंदन येथे व्यक्त केले.

निगडी वंदन (ता. सातारा) येथे विविध विकासकामांच्या भूमिपूजन समारंभ कार्यक्रमप्रसंगी ते बोलत होते. या वेळी माजी जिल्हा परिषद सदस्य मनोज घोरपडे, संदीप शिंदे उपस्थित होते. मान्यवरांच्या

उपस्थितीत येथे रस्ता कॉँक्रिटीकरण, दलित वस्ती सुधारणा योजनेंतर्गत खडीकरण व डांबरीकरण, तसेच चिंचणी येथील अंतर्गत रस्ता कॉँक्रिटीकरण व बंदिस्त गटार या कामांचे भूमिपूजन झाले.

आमदार शिंदे म्हणाले, की हे गाव लोकसंख्येने लहान असले, तरी येथील नागरिक सुज्ञ आहेत; पण या अगोदरच्या आमदारांनी लोकांना विकासकामांचा डोंगर उभा करण्याचे आश्वासन दिले होते. मात्र, त्यांनी लोकांची दिशाभूल करत गावाला मूलभूत विकासापासून दूर ठेवण्याचे पाप केले असल्याने आज सर्वसामान्य जनतेने अशा भूलथापांनी मत मिळवणाऱ्यांना मतपेटीतून उत्तर देत घरी बसविले.

यापुढे आपण मनोज घोरपडेंच्या साथीने या गावासाठी व पर्यायाने संपूर्ण मतदारसंघासाठी विविध विकासात्मक योजना मार्गी लावण्यास कटिबद्ध असल्याची ग्वाही त्यांनी या वेळी दिली.कार्यक्रमप्रसंगी निगडीचे सरपंच संतोष मांडवे, चिंचणीचे सरपंच आकाश घमरे, विलासराव शेडगे, विश्वास शेडगे, किरण येवले, रमेश कणसे, कृष्णत शेडगे, संतोष कणसे, अमोल कणसे, संदीप मांडवे, दत्ता मोरे, दीपक मांडवे, रफीक शेख हे उपस्थित होते. जयवंत जाधव यांनी कार्यक्रमांचे सूत्रसंचालन केले. आनंदराव मांडवे यांनी प्रास्ताविक, तर विलासराव मांडवे यांनी आभार मानले.