वडूज (जि. सातारा) : हिंगणे (ता. खटाव) येथील युवकाने झाडाला गळफास घेऊन आत्महत्या केल्याची घटना काल घडली. अजय चंद्रकांत यादव (वय 42) असे मृताचे नाव आहे. खटाव, माण तालुक्‍यांतील काही गावांतील एकूण 13 लोकांना उसने दिलेले 19 लाख 95 हजार रुपयांची रक्कम परत देण्यास टाळाटाळ, दमदाटी, शिवीगाळ व खोट्या गुन्ह्यात अडकविण्याची भीती दाखवित त्रास देऊन आत्महत्येस प्रवृत्त केल्याची फिर्याद मृताचे वडील व सेवानिवृत्त पोलिस कर्मचारी चंद्रकांत दत्तू यादव यांनी पोलिस ठाण्यात दिली आहे. या आधारे 13 जणांवर पोलिस ठाण्यात गुन्हा दाखल केला आहे.
 
याबाबत चंद्रकांत यादव यांनी पोलिस ठाण्यात दिलेल्या फिर्यादीतील माहितीनुसार, यादव कुटुंबीय हिंगणे येथे शेती व्यवसायानिमित्त स्थायिक झाले आहेत. तडवळे रस्त्यानजीक असणाऱ्या जोतिबा मंदिर परिसरात त्यांनी शेतातच घर बांधले होते. या घरानजीकच्या लिंबाच्या झाडास अजयने काल गळफास घेतला. मृत अजय हा शेतीबरोबर पशुपालन, वाहन व इतर व्यवसाय करीत होता. व्यवसायाच्या निमित्ताने वाहन खरेदी व इतर देवाण- घेवाणीवरून त्याचे अनेक जणांशी व्यवहार झाले होते. 

मालकाच्या घरातच चोरी करणारा जेसीबी चालक गजाआड; पाचगणी पोलिसांची महाबळेश्वरात कारवाई

यापैकी काहींनी त्याची आर्थिक फसवणूक करण्याबरोबर जीवे मारण्याची धमकी दिल्यानेच त्याने आत्महत्या केल्याची तक्रार वडील चंद्रकांत यादव यांनी दिली आहे. त्यांनी दिलेल्या फिर्यादिनुसार इम्रान सिकंदर बागवान, सुनील रामचंद्र गायकवाड, धनाजी पाटोळे, विश्वास बागल, बाळू मासाळ, जालिंदर चंद्रकांत खुडे (सर्व रा. वडूज), विलास दादासाहेब शिंगाडे कातरखटाव, रवींद्र आनंदराव राऊत गणेशवाडी, वैभव संभाजी पवार हिंगणे, पिनू पवार उंबर्डे, चंद्रकांत जगदाळे पेडगाव, अमित पिसे, अमोल कलढोणे (दोघे रा. म्हसवड) या 13 जणांविरोधात गुन्हा दाखल करण्यात आला आहे. 

संपादन : बाळकृष्ण मधाळे