सातारा : जिल्‍हाधिकाऱ्यांनी दिलेल्‍या आदेशाचा भंग करत येथील जिल्‍हा परिषद कार्यालयासमोर आंदोलन केल्‍याप्रकरणी सातारा शहर पोलिस ठाण्‍यात आशा सेविका (asha worker) संघटनेच्‍या पदाधिकाऱ्यांसह १८ जणांवर गुन्‍हा नोंदविण्‍यात आला आहे. त्याची फिर्याद हवालदार श्रध्‍दा पवार यांनी नोंदविली आहे. (satara-marathi-news-police-registered-case-against-asha-worker)

प्रलंबित मागण्‍यांकडे शासनाचे लक्ष वेधण्‍यासाठी आशा सेविकांनी जिल्‍हा परिषदेसमोर आंदोलनाचा इशारा दिला होता. या पार्श्वभूमीवर पोलिसांनी मोर्चा संयोजकांना जिल्‍हाधिकाऱ्यांच्या आदेशाची माहिती देत आंदोलन स्‍थगित करण्‍याची सूचना केली होती. पोलिसांनी केलेल्‍या सूचनेकडे दुर्लक्ष करत या आंदोलनासाठी नुकतीच जिल्‍हा परिषदेच्‍या मैदानावर मोठा जमाव जमला होता.

याप्रकरणी सातारा शहर पोलिस ठाण्‍यात आनंदी माणिक अवघडे, माणिक विष्‍णू अवघडे (रा. सदरबझार, सातारा), स्‍वाती जगन्नाथ भिवरकर (रा. अलगुडेवाडी, फलटण), पल्‍लवी गणपत नलवडे (रा. आळजापूर, फलटण ), जयश्री बाळासाहेब काळभोर (रा. पाल, ता. कऱ्हाड), सविता राजेंद्र थोरात (रा. ओंड, ता. कऱ्हाड), सावित्रा भीमराव भोसले (रा. शिवाजीनगर, खंडाळा), लक्ष्‍मी अजित दुदुस्‍कर (रा. दुदुस्‍करवाडी, ता. जावळी) यांच्‍यासह आठ जणांवर गुन्‍हा नोंदविण्‍यात आला आहे. या आंदोलनात सहभागी झालेल्‍या इतर आशा सेविकांची माहितीही पोलिसांकडून संकलित करण्‍यात येत आहे. हवालदार पोळ तपास करीत आहेत.