तळमावले (जि. सातारा) ः सध्या या भागात भातलावणीचे काम युद्धपातळीवर सुरू असून, काही ठिकाणी ते अंतिम टप्प्यात आले आहे. त्यामुळे शिवार शेतकरी व मजुरांनी गजबजून गेले आहे. 

धुळवाफेवरील भातपेरणी ते भातलावणी असा काहीसा क्रम काळगाव विभागातील पेरणीमध्ये येतो. काळगाव खोऱ्यात भात हे पीक प्रामुख्याने घेतले जाते. कमी पाण्यावरील व जास्त पाण्यावरील भाताची विविध पिके घेतली जातात. 

प्रतिवर्षी या विभागातील मुंबई-पुणे व अन्य ठिकाणी नोकरीस असलेला चाकरमानी या कामासाठी हमखास हजर राहतो; परंतु यंदा लॉकडाउनमुळे हा चाकरमानी शेतीच्या मशागतीच्या कामापासूनच शेतामध्ये व्यस्त आहे. जास्तीतजास्त वेळ शेतीमध्ये देण्याचा प्रयत्न या लोकांचा दिसून येतो. यंदा आतापर्यंत पावसाने चांगली साथ दिल्यामुळे शेतकरी राजा सुखावला आहे. 

निवी, कसणी व परिसरामध्ये नाचणीचे पीकही घेतले जाते. भात लावणीनंतर पेरणी करण्याचा हंगाम संपतो. सध्या सर्वच शिवारात भात लावणीची कामे जोमाने सुरू आहेत. पेरणीचा शेवटचा टप्पा पार करण्यात सर्व जण व्यस्त दिसत आहेत. 

भातलावणीच्या पद्धतीस आमच्याकडे रोपा लावणे असे म्हटले जाते. प्रचंड मेहनत करावी लागणारी ही प्रक्रिया आहे; परंतु या पद्धतीमुळे भाताचे उत्पन्न चांगले मिळते, त्यामुळे आम्ही ही पद्धत वापरतो. 

- राजाराम डाकवे, शेतकरी 

(संपादन ः संजय साळुंखे)

एनडीआरएफचे पथक या शहरात दाखल