कोरेगाव (जि. सातारा) : शहरातील साखळी पुलाजवळ बांधलेले सार्वजनिक स्वच्छतागृह सुरू करण्याच्या मागणीसाठी सोनेरी ग्रुपने आज "भीक मांगो' आंदोलन केले. यासंदर्भातील माहिती देताना सोनेरी ग्रुपचे अध्यक्ष संतोष नलावडे यांनी सांगितले, की साखळी पुलाजवळील स्वच्छतागृहाचे काम पूर्ण करून दीड वर्ष झाले, तरी नगरपंचायत प्रशासनाने काही तांत्रिक बाबीमुळे ते खुले केले नाही. परिणामी नागरिकांमधून वारंवार तक्रारी येत होत्या. 

दरम्यान, या प्रश्नाकडे दुर्लक्ष होत असल्याप्रकरणी नगरपंचायतीला सोनेरी ग्रुपने सातत्याने जाब विचारला. मात्र, त्यावर कोणताही ठोस निर्णय न झाल्याने संतप्त नागरिकांसह सोनेरी ग्रुपने गेल्या आठ फेब्रुवारी रोजी स्वच्छतागृहाच्या दारात उपोषणाला बसून या प्रश्नाकडे प्रशासनाचे लक्ष वेधले होते. त्या वेळी चार दिवसांत स्वच्छतागृह सुरू करण्याचे आश्वासन नगरपंचायतीने दिले होते; परंतु पुन्हा एक महिना उलटल्यानंतरही स्वच्छतागृह सुरू झाले नाही. 

पक्ष मजूबत करा; राष्ट्रवादीच्या बैठकीत नेत्यांकडून सदस्यांची कानउघडणी

प्रोत्साहन निधी नसल्याचे कारण देत प्रशासन नागरिकांना झुलवत असल्याचे लक्षात आल्यानंतर सोनेरी ग्रुपने आज नगरपंचायतीला प्रोत्साहन निधीसाठी मदत म्हणून शहरात फिरून "भीक मांगो' आंदोलन केले. नगरपंचायतीच्या कार्यालयापासून जानाई गल्ली, कापड पेठ, बुरुडगल्ली, रामलिंग नगरमार्गे, जुने मोटार स्टॅंड अशा प्रमुख ठिकाणी आंदोलन करत शेवटी साखळी पुलाजवळील स्वच्छतागृहाच्या दारात ते संपले. या आंदोलनात सोनेरी ग्रुप, सोनेरी सखी मंच, कोरेगाव नगर विकास कृती समितीचे सदस्य सहभागी झाले होते. स्वच्छतागृह सुरू करण्याच्या मागणीसाठी एका महिन्यातच आज हे दुसरे आंदोलन झाले. 

चुकीच्या पद्धतीने वसुली केल्यास अधिकाऱ्यांना काळे फासू; बळीराजाचा महावितरणला कडक इशारा

नगरपंचायतीकडून शासनाकडे प्रस्ताव 

शहरातील स्वच्छतागृहाचे बिल अदा करण्यासाठी प्रशासकीय व आर्थिक मंजुरी देण्याबाबतचा प्रस्ताव कोरेगाव नगरपंचायतीने गेल्या चार मार्च रोजी स्वच्छ महाराष्ट्र अभियान (नागरी) संचालकांना सादर केला आहे. हा प्रस्ताव मंजूर झाल्यानंतर स्वच्छतागृह सुरू केले जाईल. त्यामुळे आपण आंदोलन मागे घेऊन प्रशासनास सहकार्य करावे, असे पत्र मुख्याधिकारी विजया घाडगे यांनी आज सोनेरी ग्रुपला पाठवले आहे. 

संपादन : बाळकृष्ण मधाळे