कोळकी (जि. सातारा) : वीज वितरण कंपनीच्या चुकीच्या कारभारामुळे येथील मालोजीनगर, शारदानगर भागामध्ये वीज चोरीच्या प्रमाणात वाढ झाली आहे. या ठिकाणी काही लोकांकडून वीजवाहक तारांवर आकडे टाकून खुलेआम विजेची चोरी सुरू आहे. दिवस-रात्र हे आकडे तारांवर लटकलेलेच असतात. 

या वीजवाहक तारा मुख्य रस्त्यावरच आहेत. गेल्या अनेक वर्षांपासून येथे निवासी भाग घोषित होण्यापूर्वीपासून येथील शिंगणापूर रोडलगत वीज वितरण कंपनीचे उपकेंद्र आहे. या उपकेंद्रावर वीज वितरण कंपनीच्या कर्मचाऱ्यांची तसेच अधिकाऱ्यांची नेहमी ये-जा सुरू असते. विशेष म्हणजे या उपकेंद्राच्या जवळच खुलेआम वीज चोरी सुरू असल्याने ग्रामस्थांमधून आश्‍चर्य व्यक्त होत आहे. 

नायगावात सावित्रीबाईंच्या जयंती सोहळ्यासाठी नियमावली जाहीर : जिल्हाधिकारी सिंह

वीजवाहक तारांवर आकडे टाकणाऱ्या लोकांचे व वीज वितरण कंपनीच्या अधिकाऱ्यांचे काही आर्थिक लागेबांधे आहेत का? असा सवालही ग्रामस्थ उपस्थित करीत आहेत. चोरून फुकट वीज वापरणाऱ्यांचा वीजभार प्रामाणिकपणे वीजबिल भरणाऱ्या ग्राहकांवर पडत असल्याने असे ग्राहक वीज वितरण कंपनीवर संतापले आहेत. ही वीज चोरी कर्मचाऱ्यांच्या निदर्शनास आणून दिली तर "तुम्ही अधिकाऱ्यांशी बोला' असे उत्तर ग्रामस्थांना ऐकायला मिळते. 

संपादन : बाळकृष्ण मधाळे