विसापूर (जि. सातारा) : सध्या वीज बिल वसुलीसाठी वीज वितरण कंपनीच्या अधिकाऱ्यांनी वीज पुरवठा खंडित करण्याची मोहीम सुरू केली आहे. अर्थसंकल्पीय अधिवेशन संपताच पुसेगावसह परिसरातील बऱ्याच थकीत ग्राहकांचे कनेक्शन कोणतीही पूर्वसूचना न देता अरेरावीची भाषा वापरत तोडले जात आहे. 

या कारवाईमुळे संतप्त झालेल्या शिवसैनिकांनी थेट वीज वसुली करणाऱ्या कर्मचाऱ्यांची गाडी फोडली. यावेळी शिवसेना उपजिल्हाप्रमुख प्रताप जाधव यांनी कोणत्याही परिस्थितीत पूर्व सूचना दिल्याशिवाय एकाही ग्राहकाचा वीज पुरवठा खंडित करू देणार नाही, असा इशारा महावितरणच्या अधिकाऱ्यांना दिला. यावेळी प्रताप जाधव म्हणाले, सध्या घरगुती आणि कृषी पंपाच्या वीज बिलांच्या वसुलीचा प्रश्न गंभीर बनला आहे. येथील नागरिक, व्यावसायिक, शेतकरी लॉकडाऊन तसेच अवकाळीच्या संकटातून सावरत असतानाच महावितरणने थकीत वीज ग्राहकांना कोणतीही पूर्व सूचना न देता अरेरावीची भाषा वापरात वीज तोडणीचा एक कलमी कार्यक्रम राबविण्यास सुरुवात केली आहे. 

एकरकमी एफआरपीचे आंदोलन चिघळणार?; शेट्टींचा पाटलांसह साखर आयुक्तांना इशारा

महावितरणने ग्राहकांना वीज बिल भरण्यासाठी किमान दोन दिवसांची मुद्दत द्यावी. तसेच गोर-गरीब जनतेवर अरेरावी व दमदाटीची भाषेचा वापर करू नये अशा सूचना महावितरणच्या अधिकाऱ्यांना दिल्या. सध्याची ग्रामीण भागातील आर्थिक परिस्थिती पाहता राज्य सरकारने दुष्काळी भागातील वीज तोडणीबाबत वेगळा निकष लावून दुष्काळी भागातील जनतेला न्याय द्यावा, अशी मागणी देखील यावेळी शिवसेनेच्या कार्यकर्त्यांनी केली. दरम्यान, महावितरणने आपल्या कारभारात सुधारणा न करता, तसेच कोणतीही पूर्वकल्पना न देता अरेरावीची भाषा वापरात एका जरी ग्राहकांची वीज कनेक्शन तोडले तर शिवसेना याचा तीव्र विरोध करेल, अशी माहिती जाधव यांनी यावेळी दिली.

वीज कनेक्‍शन तोडल्याने महावितरणच्या कर्मचाऱ्यास मारहाण; कोंडव्यात हॉटेल चालकासह दोघांवर गुन्हा

पृथ्वीराज चव्हाणांचा घात करणारे काय विकास साधणार?; भाजपचे यादवांना चोख प्रत्युत्तर

संपादन : बाळकृष्ण मधाळे