फलटण शहर (जि. सातारा) : शहरात मास्कचा वापर न करणाऱ्या, तसेच सोशल डिस्टन्सिंगचे पालन न करणाऱ्या नागरिकांवर पोलिसांकडून केलेल्या कारवाईद्वारे गत दोन दिवसांत 25 हजार रुपये दंड वसूल करण्यात आला आहे. 

फलटण शहरात कोरोना विषाणूचा संसर्ग वाढतो आहे. त्या अनुषंगाने गेल्या दोन दिवसांमध्ये प्रांताधिकारी शिवाजीराव जगताप, पोलिस उपअधीक्षक तानाजी बरडे, शहर पोलिस ठाण्याचे निरीक्षक भारत किंद्रे, अन्य पोलिस अधिकारी व कर्मचाऱ्यांच्या उपस्थितीमध्ये शहरातील डॉ. बाबासाहेब आंबेडकर चौक, पृथ्वी चौक, क्रांतिसिंह नाना पाटील चौक, तसेच बाजारपेठेमध्ये विदाऊट मास्क, सोशल डिस्टन्सिंगबाबत मोहीम राबविण्यात आली. 

Good News : रॅपिड सर्व्हेमुळे दहिवडीत कोरोना रुग्णांची साखळी तोडण्यात यश 

या मोहिमेत गुरुवारी (ता. 18) मास्कविना फिरणाऱ्या 47 जणांकडून 7600 रुपये दंड घेण्यात आला, तर सोशल डिस्टन्सिंगचे पालन न करणाऱ्या आठ प्रकारातून 8000 रुपये दंड असा एकूण 15600 रुपये दंड आकारण्यात आला आहे. शुक्रवारी (ता.19) फलटण शहर पोलिस ठाणे हद्दीत प्रमुख चौकातून, तसेच बाजारपेठमध्ये मास्कविना फिरणाऱ्या 48 नागरिकांवर दंडात्मक कारवाई करण्यात आली असून, त्यांच्याकडून 9,600 रुपये दंड आकारण्यात आलेला आहे. 

विनामास्क फिरणा-या व्यापाऱ्यांना तांबवेत ठोठावला चार हजार दंड

संपादन : बाळकृष्ण मधाळे