कऱ्हाड (जि. सातारा) : ज्येष्ठ नेते यशवंतराव चव्हाण यांचा समाधी परिसर, त्यालगतची प्रीतिसंगम बाग आदी ठिकाणी होणारी हुल्लडबाजीला लगाम बसणार आहे. वास्तविक दीड वर्षापूर्वी बागेतील कोपऱ्यात पोलिस चौकीला पालिकेने ठराव घेऊन मान्यता दिली होती. त्या जागेत आता 20 लाख खर्चून पोलिस चौकीची इमारत, त्यासाठीच्या सुविधा पालिकेने पुरवल्या आहेत. त्यामुळे समाधिस्थळाच्या पावित्र्यासह बाग परिसरातील स्वैराचारालाही लगाम लागणार आहे.
 
ज्येष्ठ नेते यशवंतराव चव्हाण यांचे समाधिस्थळ, त्यालगत बाग आणि किमान 200 मंदिरांचा वारसा सांगणारा ऐतिहासिक कृष्णा घाट येथे आहे. त्यामुळे येथे स्थानिकांसह बाहेरील पर्यटकांचा राबता आहे. समाधिस्थळ, बाग, मंदिरांचा परिसर पाहण्यास सहलीही येतात. मात्र, अलीकडच्या काळात त्या भागातील शांतता हरवली आहे, तेथे हुल्लडबाजांचे प्रमाण वाढले आहे. 

वावरहिऱ्यात मुलांकडून वृक्षसंवर्धनाचा वसा; लॉकडाउनमध्ये जगवली तब्बल अडीच हजार झाडे

त्यामुळे त्या भागात पोलिस चौकी व्हावी, अशी यशवंतप्रेमींचा मागणी होती. त्यासाठी मनसेच्या ऍड. विकास पवार, शहराध्यक्ष सागर बर्गे, दादा शिंगण यांनी आंदोलनही केले होते. त्यांच्या लढ्यानंतर पालिकेने पोलिस चौकीसाठी जागा दिली. दीड वर्षात पोलिस चौकीची इमारतही उभी राहिली आहे. त्यासाठी पालिकेने 20 लाखांचा खर्च केला आहे. ही इमारत उद्‌घाटनाच्या प्रतीक्षेत आहे. कृष्णा घाट व परिसरावर नियंत्रण ठेवण्याचे काम पोलिसांना या चौकीमुळे सोपे जाणार आहे. 

चिलीम आणि कोंबडीचं रक्त दिलं की धावजी पाटील प्रसन्न होताे...! 

...असे होणार उपाय

• हुल्लडबाज तरुणांवर थेट कारवाई 
• व्यसनी स्थानिकांवरही कारवाईत पुढाकार 
• प्रेमीयुगुलांच्या नातेवाईकांना बोलावून समज दिली जाणार 
• प्रीतिसंगम बागेत खाद्यपदार्थ खाण्यास मनाईची अंमलबजावणी 
• नदीकाठावरील वाळू चोरांवर थेट नियंत्रण 
• धूमस्टाईलच्या युवकांवर कारवाई 

संपादन : बाळकृष्ण मधाळे