ढेबेवाडी- पाटण तालुक्यातील निवडणुकांत वेगळाच आणि लोकशाहीला घातक असा पायंडा पडतो आहे. निवडणुका लागल्या, की मुंबईवरून शेठजी गावाकडे येतात आणि पैशाचा तमाशा होतो. तालुक्यात खऱ्या अर्थाने काहीतरी चांगले घडवायचे असेल, तर विकासाची तळमळ असलेली चांगली माणसे सत्तेत आणा, असे आवाहन युवा नेते सत्यजितसिंह पाटणकर यांनी केले.

जानुगडेवाडी (ता. पाटण) गावचे सुपुत्र ॲड. अविनाश जानुगडे यांची पाटण तालुका खरेदी- विक्री संघाच्या अध्यक्षपदी फेरनिवड झाल्याबद्दल त्यांचा, तसेच तेथील विविध कार्यकारी सहकारी सेवा सोसायटीचे नूतन अध्यक्ष अमर जानुगडे, उपाध्यक्ष राजाराम सावंत व अन्य संचालकांचा सत्कार करण्यात आला. त्याप्रसंगी ते बोलत होते.

माजी उपसभापती प्रतापराव देसाई, रघुनाथ जाधव, प्रतापराव काळे, सुनंदा पाटील, उत्तमराव जाधव, सुभाष पाटील, पोपटराव खेडेकर, अनिल डाकवे, रामभाऊ साळुंखे, श्री. नाईकबा देवस्थान ट्रस्टचे अध्यक्ष विलासराव जानुगडे, माजी प्राचार्य अजय जानुगडे, निवासराव जानुगडे, सोनाप्पा जानुगडे, वत्सलाताई जानुगडे, शशिकांत जानुगडे,

भरत जानुगडे, अनिल जानुगडे, संदीप जाधव, अशोकराव जानुगडे, दादासाहेब झेंडे, प्रभाकर पांढरपट्टे आदींसह आजी, माजी पदाधिकारी, ग्रामस्थ, कार्यकर्ते उपस्थित होते. सत्यजितसिंह पाटणकर म्हणाले, ‘‘तालुक्यात सद्यःस्थितीला टक्केवारी शिवाय दुसरा उद्योगच उरलेला नाही.

एकाच रस्त्यावर दोन- तीन वेळा निधी टाकला जात आहे. उसाच्या बाबतीत बोलायचे झाले तर तुमच्यासारखी आमचीही गत झाली आहे. मात्र, काळजी करू नका लवकरच आपलाही कारखाना सुरू होणार आहे. सध्या राजकारणात केव्हा काय घडामोड घडेल आणि कुणाची कुणाबरोबर युती होईल, हे सांगता येत नाही.

मात्र, वर काहीही घडूद्यात, आपण सर्वांनी माजी मंत्री विक्रमसिंह पाटणकर यांनी दिलेल्या विकासाच्या विचाराच्या मार्गावरून चालायचे आहे. लोक विसरून जातात म्हणून पाटणकरांनी तालुक्यात केलेल्या प्रचंड विकासाची वेळोवेळी उजळणी होणेही गरजेचे आहे.’’ अजय जानुगडे म्हणाले, ‘‘जीवनात निष्ठेला खूप मोठे महत्त्व आहे.

विकासाची दूरदृष्टी असलेल्या पाटणकर घराण्याशी असलेली आमची निष्ठा पुढेही कायम राहील. गावचा शाश्वत आणि सर्वांगीण विकास साधण्याचा आम्ही प्रयत्न केलेला आहे.’’ आनंदराव जानुगडे यांनी सूत्रसंचालन केले. सदानंद ऊर्फ मल्हारी जानुगडे यांनी आभार मानले.