सातारा : सातारा जिल्‍हा मध्‍यवर्ती सहकारी बँकेच्‍या पंचवार्षिक निवडणुकीसाठीच्‍या (Satara Bank Election) राजकीय घडामोडींना वेग आला असून, या निवडणुकीसाठी अर्ज भरण्‍याचा उद्या (सोमवार) शेवटचा दिवस आहे. या दिवशी कोण-कोण अर्ज दाखल करणार, याकडे जिल्‍हावासीयांचे लक्ष लागून राहिले असून, अर्ज भरण्‍यावरच पुढील राजकीय रणधुमाळीचे भवितव्‍य अवलंबून असणार आहे. दरम्यान, राष्‍ट्रवादीसह (NCP) इतर पक्षीय उमेदवार शक्‍तिप्रदर्शन करत आपले अर्ज दाखल करणार आहेत.

जिल्‍हा बँकेची निवडणूक जाहीर झाल्‍यापासून जिल्‍ह्यातील राजकीय घडामोडींना वेग आला आहे. ही निवडणूक बँकेच्‍या प्रथा आणि परंपरेनुसार पक्षविरहित करण्‍याच्‍या सूचना खासदार शरद पवार (MP Sharad Pawar) आणि उपमुख्‍यमंत्री अजित पवार (Ajit Pawar) यांनी केल्‍या होत्‍या. यानुसार बँकेसाठी इच्‍छुक असणाऱ्यांची मोट बांधण्‍याचे काम विधान परिषदेचे सभापती रामराजे नाईक-निंबाळकर (Ramraje Naik-Nimbalkar) यांनी हाती घेतले होते. यासाठी त्‍यांनी बँकेचे अध्यक्ष आमदार शिवेंद्रसिंहराजे भोसले (MLA Shivendrasinharaje Bhosale), पालकमंत्री बाळासाहेब पाटील, आमदार शशिकांत शिंदे, आमदार बाळासाहेब पाटील यांच्‍यात संयुक्‍त बैठक घडवून आणली. या बैठकीत मतदार संख्‍येनुसार जागा वाटप व इतर बाबी जाणून घेत प्रत्‍येक मतदारसंघातून कोणाला उमेदवारी द्यायची, यावर चर्चा झाली.

मध्‍यंतरीच्‍या काळात मतदारसंघातील घुसखोरीवरून आमदार शिवेंद्रसिंहराजे आणि शशिकांत शिंदे यांच्‍यात वाद झाला होता. या वादाचे पडसाद जिल्‍हा बँकेच्‍या निवडणुकीत उमटण्‍यास सुरुवात झाली होती. या वादावरही अजित पवार यांच्‍या उपस्‍थितीत चर्चा झाली. चर्चेअंती आमदार शिंदे यांच्‍याविरोधातील होणारी संभाव्‍य बंडखोरी मोडून काढण्‍यात आल्‍याची चर्चा सुरू आहे. निवडणुकीसाठी अर्ज दाखल करण्‍याचा उद्या शेवटचा दिवस आहे. उद्या राष्‍ट्रवादीसह इतर पक्षीय उमेदवार शक्‍तिप्रदर्शन करत आपले अर्ज दाखल करणार आहेत. अर्ज भरल्‍यानंतरच निवडणुकीच्‍या लढतीचे व इतर राजकीय चित्र स्‍पष्‍ट होणार आहे.