कऱ्हाड (जि. सातारा) : विश्वास नांगरे पाटील असो अथवा अन्य कोण आरटीओ.. कुणाचीच माझ्या गाडीला हात लावायची हिम्मत नाही, अशी धमकी तालुका पोलिस ठाण्यातील महिला फौजदारास खासगी प्रवासी वाहतूक करणाऱ्या बस व्यावसायिकाने दिली. संबंधिताने केवळ धमकी दिली नाही, तर तो त्या महिला अधिकाऱ्यांच्या अंगावर धावून गेला. उंडाळे येथील भरचौकात हा प्रकार घडला असून भागात चर्चा सुरु आहे. या प्रकरणी विजय चिंचोळकर (रा. रांजणवाडी, ता. शिराळा) याच्यावर गुन्हा दाखल आहे.
फौजदार दीपज्योती पाटील यांनी त्याच्या विरोधात तक्रार दिली आहे. पोलिसांनी सांगितले की, रविवारी सायंकाळी उंडाळे येथे ट्रॅव्हल्स कंपनीच्या सहा बस उभ्या होत्या. त्यावेळी रयत साखर कारखान्याला जाणारे ट्रॅक्टर व आठवडी बाजारामुळे तेथे वाहतूक कोंडी होती. त्याबाबत काही नागरिकांनी उंडाळे पोलिस दूरक्षेत्रच्या पोलिस उपनिरीक्षक दीपज्योती पाटील यांना माहिती दिली. त्यांनी तेथे येऊन ट्रॅव्हल्सचे मालक विजय चिंचोळकर यांना गाड्या बाजूला काढण्यास सांगितले.
मात्र, चिंचोळकर यांनी पोलिसांशी वाद घालण्यास सुरवात केली. विश्वास नांगरे पाटलांसह कुठल्या आरटीओची हिम्मत नाही माझ्या गाड्यांना हात लावायची, वर्दीत तुला घमेंडी आहे का, अशी सज्जड धमकी देत ट्रॅव्हल्स मालक त्यांच्या अंगावर धावून गेला. भरचौकात हा प्रकार सुरू होता. त्यामुळे नागरिकही जमा झाले. यावेळी त्याने पोलिसांना धक्काबुक्की करण्याचा प्रकारही झाला. त्याबाबत पोलिस उपनिरीक्षक दीपज्योती पाटील यांनी कऱ्हाड तालुका पोलिसांत तक्रार दिली, त्यानुसार गुन्हाही दाखल झाला आहे.
संपादन : बाळकृष्ण मधाळे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.