सातारा : भारतीय हवामान खात्याने (Meteorology Department) दिलेल्या पूर्वसूचनेनुसार, दिनांक 25 ते 30 जुलै अखेर सातारा जिल्ह्यात अतिवृष्टीचा रेड व ऑरेंज अलर्टचा इशारा देण्यात आलेला आहे. सातारा जिल्ह्यात सद्यस्थितीमध्ये मोठ्या प्रमाणावर अतिवृष्टी होत आहे. हवामान विभागाने सातारा आणि घाट क्षेत्रात मुसळधार पावसाचा इशारा दिला आहे.

सातारा जिल्ह्यातील महाबळेश्वर (Mahabaleshwar) तालुक्यातील लिंगमळा व भिलार धबधबा, तसेच सर्व पर्यटनाचे पॉइंट, पाटण तालुक्यातील ओझर्ड (नवजा) व सडावाघापूर धबधबा (Sadawaghapur Waterfall), सातारा तालुक्यातील ठोसेघर, केळवली, वजराई-भांबवली धबधबे व कास तलाव, जावली तालुक्यातील ऐकीव या धबधब्यांच्या ठिकाणी विशेषतः मान्सून कालावधीत वर्षाविहारासाठी मोठ्या प्रमाणात पर्यटक येत असतात.

सदर ठिकाणी कोणतीही अनुचित घटना घडू नये व जीवित व वित्तहानी होऊ नये, या करिता सुरक्षिततेच्या कारणास्तव सातारा जिल्ह्यातील धबधबे व पर्यटनस्थळे पर्यटकांसाठी तात्पुरत्या स्वरुपात बंद ठेवणे आवश्यक असल्याने जिल्हाधिकारी तथा अध्यक्ष जिल्हा आपत्ती व्यवस्थापन प्राधिकरण, सातारा जितेंद्र डुडी यांनी सातारा जिल्ह्यातील लिंगमळा व भिलार धबधबा, ओझर्डे (नवजा), सडावाघापूर धबधबा, ठोसेघर, केळवली, वजराई-भांबवली धबधबे, कास तलाव, ऐकीव ही धबधब्याची ठिकाणे आणि जिल्ह्यातील सर्व पर्यटन स्थळे पर्यटकांच्या सुरक्षिततेसाठी तात्पुरते बंद करण्याचे आदेश दिले आहेत. सदर धबधब्यांच्या / पर्यटन स्थळांच्या ठिकाणी अतिवृष्टीच्या कालावधीत पर्यटकांना 28 जुलै पर्यंत जाण्यास तात्पुरत्या स्वरुपात बंदी घालण्यात आली आहे.