• एसी १८-२० डिग्रीवर न लावता २४-२६ डिग्रीवर ठेवावा.

• पावसात ड्राय मोड वापरल्यास आर्द्रता कमी होऊन हवा अधिक थंड राहते.

• एसीचे फिल्टर नियमित स्वच्छ केल्यास वीजबिल आणि एसीवरील ताण कमी होतो.

पावसाळा आला की उकाड्यापासून दिलासा मिळतो खरा, पण त्याचवेळी वातावरणातील आर्द्रता प्रचंड वाढते. अशा वेळी कूलर आणि फॅन अपुरे वाटू लागतात आणि घरात आरामदायक हवामानासाठी एसीच एकमेव पर्याय उरतो. मात्र अनेक लोक एसी वापरताना काही महत्त्वाच्या गोष्टींकडे दुर्लक्ष करतात, ज्यामुळे ना हवा नीट थंड होते, ना वीजबिल कमी येते.

पावसाळ्यात एसी योग्य प्रकारे कसा वापरायचा, यासाठी काही सोप्या पण प्रभावी टिप्स आम्ही सांगणार आहोत

१. योग्य तापमान सेट करा

पावसाळ्यात बाहेरील तापमान फारसे वाढत नाही, त्यामुळे एसी १८ किंवा २० डिग्रीवर चालवणे गरजेचे नाही. असं केल्याने एसीवर ताण येतो, विजेचा वापर जास्त होतो आणि तरीही हवा तितकीशी थंड वाटत नाही. तज्ज्ञांच्या मते, २४ ते २६ डिग्री सेल्सिअस तापमान हे घरात आरामदायक वातावरण निर्माण करतं आणि वीजबिलही नियंत्रणात राहतं.

२. ‘ड्राय मोड’ वापरा

बहुतेक लोक एसीचा 'कूल मोड' वापरतात, जो उन्हाळ्यासाठी योग्य असतो. पण पावसाळ्यात वातावरणात आर्द्रता जास्त असल्यामुळे ‘ड्राय मोड’ अधिक प्रभावी ठरतो. हा मोड घरातील आर्द्रता कमी करून हवेला अधिक थंड आणि सुखद बनवतो. त्यामुळे कमी तापमानावरही चांगली थंड हवा मिळते आणि एसी जास्त वेळ चालवण्याची गरज राहत नाही.

३. नियमित सर्व्हिसिंग आणि साफसफाई आवश्यक

पावसाळ्यात वाऱ्याबरोबर धूळ आणि ओलसर कण घरात येतात. त्यामुळे एसीच्या फिल्टरमध्ये धूळ साचते आणि एअर फ्लो कमी होतो. परिणामी, एसीवर ताण येतो आणि वीजबिल वाढतं. त्यामुळे एसीच्या इनडोअर युनिटचे फिल्टर आणि ब्लोअर दर पंधरा दिवसांनी स्वच्छ करणे गरजेचे आहे. हवेचा प्रवाह सुधारतो आणि घरातील हवा स्वच्छ व ताजी राहते.

पावसाळ्यात एसीचा वापर करणे ही गरज असली, तरी योग्य सवयी अंगीकारल्यास तुमचे वीजबिलही कमी राहील आणि घरातील थंडावा टिकून राहील. छोट्या गोष्टींकडे लक्ष दिल्यास खिशावर ताण न येता ही उपकरणे वापरता येतात.

FAQs

1. पावसाळ्यात एसी कोणत्या तापमानावर चालवावा?
   ➤ २४ ते २६ डिग्री सेल्सिअस तापमान सर्वाधिक उपयुक्त आहे.

2. ड्राय मोड काय असतो आणि तो का वापरावा?
   ➤ ड्राय मोड हवेतील आर्द्रता कमी करतो, त्यामुळे पावसात चांगली थंड हवा मिळते.

3. एसी किती दिवसांनी स्वच्छ करावा?
   ➤ दर १५ दिवसांनी फिल्टर व ब्लोअर स्वच्छ करणे गरजेचे आहे.

4. पावसात एसी वापरल्याने वीजबिल वाढते का?
   ➤ योग्य मोड आणि तापमान न वापरल्यास वीजबिल निश्चित वाढते.