Google ने स्मार्टफोन चोरीपासून संरक्षणासाठी एक नवे फिचर ‘आयडेंटिटी चेक’ आणले आहे. सुरुवातीला हे फिचर Pixel आणि Samsung Galaxy स्मार्टफोन्ससाठी उपलब्ध असून लवकरच इतर ब्रँड्सच्या डिव्हाइससाठीही ते सुरू केले जाणार आहे. या फिचरच्या मदतीने तुमच्या डिव्हाइसचे आणि त्यातील डेटाचे चोरीपासून संरक्षण होणार आहे.

‘आयडेंटिटी चेक’ फिचर कसे काम करते?

‘आयडेंटिटी चेक’ फिचर स्मार्टफोन सेटिंग्ज किंवा महत्त्वाच्या खात्यांवर अनधिकृत प्रवेश रोखण्यासाठी विकसित केले गेले आहे. या फिचरच्या मदतीने महत्त्वाच्या सेटिंग्ज अॅक्सेस करण्यासाठी बायोमेट्रिक ओळख (फिंगरप्रिंट किंवा फेस रिकग्निशन) आवश्यक आहे. तुम्ही विशिष्ट ठिकाणे ‘ट्रस्टेड लोकेशन्स’ म्हणून सेट करू शकता, ज्यामुळे त्या ठिकाणी वारंवार ओळख सिद्ध करण्याची गरज भासत नाही.

जर तुमच्या डिव्हाइसचा PIN चोरी झाला तरी हे फिचर अनधिकृत अॅक्सेस रोखण्याचे काम करते. शिवाय, ‘थीफ डिटेक्शन लॉक’ नावाचे आणखी एक फिचर Android 10 किंवा त्याहून नवीन व्हर्जनवर चालणाऱ्या डिव्हाइससाठी उपलब्ध आहे. हे तंत्रज्ञान डिव्हाइस चोरीला जाण्याची शक्यता ओळखून स्क्रीन लॉक करण्याचे काम करते.

कुठल्या डिव्हाइससाठी उपलब्ध आहे हे फिचर?

सध्या ‘आयडेंटिटी चेक’ फिचर Android 15 वर चालणाऱ्या Pixel आणि Samsung Galaxy डिव्हाइससाठी उपलब्ध आहे.

Samsung Galaxy S25 सिरीजच्या स्मार्टफोन्समध्ये हे फिचर आहे, ज्यामध्ये Galaxy S25, Galaxy S25+, आणि Galaxy S25 Ultra यांचा समावेश आहे.

तसेच, Google Pixel साठी हे फिचर Pixel 6, Pixel 7, Pixel 8, Pixel 9 सिरीज तसेच Pixel Fold डिव्हाइसवर उपलब्ध आहे.

Google ने जाहीर केले आहे की हे फिचर भविष्यात इतर ब्रँड्सच्या स्मार्टफोन्ससाठीही सुलभ केले जाईल. त्यामुळे Android युजर्ससाठी स्मार्टफोन सुरक्षा आणखी बळकट होणार आहे.

स्मार्टफोनच्या डेटाचे संरक्षण करण्यासाठी Google ने आणलेले हे फिचर एक महत्त्वाचे पाऊल ठरणार आहे. विशेषतः ट्रस्टेड लोकेशन्सची सुविधा आणि बायोमेट्रिक ओळख यामुळे युजर्सचा डेटा सुरक्षित राहणार आहे. त्यामुळे आता तुमचा स्मार्टफोन हरवला तरी तुमच्या महत्त्वाच्या सेटिंग्जवर अनधिकृत व्यक्तीचा प्रवेश होणार नाही, ही खात्री मिळणार आहे.