कोरोना काळानंतर जगभरातील डेटा सेंटर्समध्ये वाढ होताना दिसून येत आहे. यामध्ये भारत देखील मागे नसून, देशात 151 डेटा सेंटर्स आहेत. सर्वाधिक डेटा सेंटर असणाऱ्या देशांमध्ये भारत जगात 14व्या क्रमांकावर आहे. अर्थात, भारतातील इंटरनेट यूजर्सची वाढती संख्या पाहता, देशात आणखी डेटा सेंटर्सची नितांत गरज आहे.

बिझनेस इन्सायडरने दिलेल्या एका रिपोर्टनुसार, सर्वाधिक डेटा सेंटर असणाऱ्या देशांमध्ये अमेरिका पहिल्या क्रमांकावर आहे. अमेरिकेमध्ये तब्बल 5,375 डेटा सेंटर आहेत. यानंतर दुसऱ्या क्रमांकाावर जर्मनी (522) आणि तिसऱ्या क्रमांकावर युनायटेड किंगडम (517) आहेत. चौथ्या क्रमांकावर चीन (448) आणि पाचव्या क्रमांकावर कॅनडा (335) आहे.

भारतात इंटरनेट यूजर्सची संख्या सुमारे 880 दशलक्ष एवढी आहे. ही संख्या अमेरिकेच्या दुप्पट आणि यूकेच्या तुलनेत 12 पट अधिक आहे. असं असतानाही अमेरिका आणि यूकेमध्ये भारतापेक्षा कित्येक पटींनी अधिक डेटा सेंटर्स आहेत. (Tech News)

काय असतात डेटा सेंटर?

इंटरनेट यूजर्सचा डेटा साठवणे, त्यावर प्रक्रिया करणे आणि त्याचे वाटप करणे यासाठी डेटा सेंटर उभारण्यात आलेले असतात. याठिकाणी कित्येक कम्प्युटर, स्टोरेज सिस्टीम, कम्प्युटिंग इन्फ्रास्ट्रक्चर अशा गोष्टींची गरज भासते.

सध्या मुंबईमध्ये देशातील सर्वाधिक (50) डेटा सेंटर आहेत. यानंतर दुसऱ्या क्रमांकावर चेन्नई (14) आहे. त्यानंतर दिल्ली (11), बंगळुरू (10), पुणे (9) आणि हैदराबादचा (5) क्रमांक लागतो. 2026 सालापर्यंत मुंबईमध्ये आणखी 47 डेटा सेंटर उभारण्याची क्षमता आहे. तर, हैदराबादमध्ये आणखी 13 डेटा सेंटर्स उभारण्याची क्षमता असल्याचं या रिपोर्टमध्ये म्हटलं आहे.