Nothing Phone Discount Offers : नथिंग कंपनीच्या सीईओ कार्ल पे यांनी दिवाळीच्या निमित्ताने होणाऱ्या फेस्टिव्हल सेलबद्दल मोठी घोषणा केली आहे. त्यांच्या कंपनीचे CMF फोन 1 आणि नथिंग फोन 2a हे फोन खूपच कमी किंमतीत उपलब्ध होणार असल्याची माहिती त्यांनी दिली आहे. चला तर, या जबरदस्त ऑफरची सविस्तर माहिती आम्ही तुम्हाला सांगणार आहोत.

फ्लिपकार्ट बिग बिलियन डे सेलमध्ये अनेक फोनवर आकर्षक ऑफर्स येणार आहेत, पण नथिंग फोनच्या ऑफर्सबद्दल अजून कोणतीही माहिती नव्हती. पण आता कंपनीचे सीईओ कार्ल पे यांनी स्वतःच फेस्टिव्हल ऑफरची घोषणा केली आहे. त्यांनी सांगितले आहे की, CMF फोन 1 फक्त 12,999 रुपयांमध्ये उपलब्ध होणार आहे. आधी याच फोनची सुरुवातीची किंमत 15,999 रुपये होती. म्हणजेच, नथिंग कंपनी या फोनवर तब्बल 3,000 रुपयांची मोठी सूट देणार आहे. विशेष म्हणजे, हा फोन आधीच कमी किंमतीत मिळत होता आणि आता मिळणाऱ्या फेस्टिव्हल ऑफरमुळे ही खूपच आकर्षक डील असणार आहे.

या ऑफरमध्ये नेमका काय समावेश आहे याची अजून माहिती नाही. बँक ऑफर आणि थेट डिस्काउंट असा या ऑफरचा फॉरमेट असू शकतो, पण अजून याबाबत कोणतीही पुष्टी झालेली नाही. याबाबतची सविस्तर माहिती येत्या काही दिवसांत मिळण्याची शक्यता आहे.

नथिंग फोन 2a घेण्याचा विचार करणाऱ्यांसाठीही ही आनंदाची बातमी आहे. या फोनची किंमत देखील लवकरच कमी होणार आहे. कार्ल पे यांनी सांगितलं आहे की, फेस्टिव्हल सेलमध्ये फोन 2a फक्त 18,999 रुपयांमध्ये उपलब्ध होईल. या फोनची भारतात सुरुवातीची किंमत 23,999 रुपये होती. म्हणजेच, कंपनी या फोनवर 5,000 रुपयांची सूट देऊ शकते. ही सूट बँकेच्या ऑफरवर अवलंबून असू शकते, पण याबाबत अजून कोणतीही पुष्टी नाही.

फ्लिपकार्ट बिग बिलियन डे सेल 27 सप्टेंबरपासून सुरु होणार आहे. फ्लिपकार्ट प्लस सबस्क्रिप्शन असणाऱ्यांना एक दिवसानंतर म्हणजे 28 सप्टेंबरपासून ही सेल सुरु होईल. पण महत्वाची गोष्ट म्हणजे, नथिंग फोनच्या ऑफर्सची घोषणा फ्लिपकार्ट 22 सप्टेंबरला करणार आहे.