टेलिकॉम ऑपरेटर्स लवकरच मोठी दरवाढ जाहीर करण्याचा विचार करत आहेत. प्रत्येक युजरमागचं आपलं उत्पन्न वाढवण्यासाठी ही दरवाढ होणार असून निष्क्रिय युजर्सना काढून टाकण्यात येणार आहे. डिसेंबर २०२१ मध्ये दरवाढ करूनही सक्रिय ग्राहकांची संख्या वाढलेलीच आहे.

मात्र निष्क्रिय, कमी प्रमाणात वापर करणारे ग्राहक कंपन्यांनी गमावले आहेत. हे युजर्स कमी प्रमाणात फोन वापरणारे, निष्क्रिय आणि एक किंवा अधिक कनेक्शन्स घेतलेले आहेत. अशा प्रकारचे निष्क्रिय ग्राहक हटवल्याने रिलायन्स जिओच्या सक्रिय युजर्सची संख्या वाढली आहे. फेब्रुवारीच्या अखेरपर्यंत ही संख्या सर्वाधिक म्हणजे ९४ टक्क्यांवर पोहोचली आहे.

टेलिकॉम क्षेत्रातल्या तज्ज्ञांनी सांगितलं की भारती एअरटेल सध्या प्रत्येक युजरमागचं आपलं उत्पन्न वाढवण्याच्या दृष्टीने विचार करत आहे आणि जिओ आपल्या नेटवर्कवरील युजर्स टिकवण्यासाठी आणि वाढवण्यासाठीचे प्रयत्न करतायत. भारती एअरटेलला या वर्षी प्रत्येक व्यक्तीमागे २०० रुपये वाढ होण्याची अपेक्षा आहे. डिसेंबरच्या शेवटापर्यंत प्रति व्यक्ती उत्पन्न १६३ रुपये होतं. तसंच वोडाफोन आयडिया ही कंपनीसुद्धा याच प्रयत्नात आहेत. मात्र अद्याप कंपनीने आपले आकडे जाहीर केलेले नाहीत.

या दरवाढीमुळे वायरलेस सबस्क्राईबर्सच्या संख्येत गेल्या दोन महिन्यांमध्ये मोठी घट झाली आहे. मात्र सक्रिय युजर्सची, बिल भरणाऱ्या ग्राहकांची संख्या वाढत आहे. टेलिकॉम ही आता अत्यावश्यक सेवा झाल्याने हे होत आहे.