नाव -     दीपाली कैलाजे
गाव -     मुंबई
काम -     शिपिंग कंपनीमध्ये उच्च पदावर कार्यरत.

‘जोदी तोरे डाक शूने केऊ ना अशे तोबे एकला चोलो रे...’
रवींद्रनाथांचे हे प्रेरणादायी शब्द प्रत्येक ‘सोलो’साठी आणि प्रत्येक ‘सोलो ट्रॅव्हलर’च्या प्रवासासाठी अगदी चपखल बसतात ना! कोणीतरी प्रवासात एकटीला सोडून जाते किंवा कोणीतरी अचानक ठरलेला प्रवासच रद्द करतो आणि बऱ्याचदा हाच क्षण ठरतो आयुष्याला ‘कलाटणी’ देणारा आणि ‘एकला चोलो’ म्हणणारा...

ताज्या बातम्यांसाठी डाऊनलोड करा ई-सकाळचे ऍप

दीपालीच्या बाबतीतही असेच काहीसे झाले. तिच्या पतीने सहा महिन्यांपूर्वी ठरवलेला ट्रेक शेवटच्या क्षणी रद्द केला. गाइडच्या मदतीने तिने हा पाच दिवसांचा ट्रेक पूर्ण केला. दीपाली सांगते, ‘‘लाकडावर अन्न शिजवणे, एकटीने तंबूत राहणे या गोष्टी माझ्यासाठी नवीन होत्या. रात्री मला भीती वाटायची, वाऱ्याने तंबूच उडून गेला तर! नक्कीच असे काही झाले नाही, मात्र या ट्रेकनंतर एका गोष्टीची जाणीव झाली, की रोजच्या धावपळीतून, कुटुंबापासून दूर असा ‘मी टाइम’ अर्थात स्वतःला स्वतःसाठी वेळ देणे आवश्यक आहे. यात तुम्ही नेहमीपेक्षा वेगळ्या, तुम्हाला आवडणाऱ्या गोष्टी कराव्यात.’’ 

थायलंड, नेपाळ, स्वीडन, पॅरिस, इस्राईल आणि जॉर्डन या देशांचा व नीमराना, जयपूर, लडाख, उत्तराखंड व हिमाचल प्रदेश असा प्रवास तिने एकटीने केला आहे. यातील इस्राईल हा त्यांच्या लोकसंस्कृतीमुळे आणि स्वीडन हा त्यांच्या आदरातिथ्यामुळे तिला अपार प्रिय आहे.

‘इस्राईलला जाताना मुंबई विमानतळावर काही कटू प्रसंगांना सामोरे जावे लागले. खूप वाईट वाटले; पण इतकी वर्षं उराशी बाळगलेले स्वप्न असेच कसे सोडून देऊ? परंतु तिकडे पोचल्यावर या कटू प्रसंगाचे मळभ कुठल्या-कुठे दूर झाले. शिवाय, याच प्रवासात मला दोन चांगल्या ‘सोलो ट्रॅव्हलर’ मैत्रिणीही भेटल्या. लवकरच आम्ही मसाई मारा इथे वाइल्ड लाइफ सफरीवर एकत्रित जाणार आहोत,’’ असे दीपाली सांगते. 

दीपालीशी बोलताना एक जाणवलं, की ती तिच्या टूर्सचे खूप बारकाईने नियोजन करते. घरच्या सर्व जबाबदाऱ्या पार पाडून योग्य त्या प्रकारे टूरचे आर्थिक नियोजन हा त्यातील पहिला आणि महत्त्वाचा टप्पा. प्रवासाच्या ठिकाणाची इत्थंभूत माहिती, विविध ब्लॉग व रिव्ह्यू वाचणे या अजून काही महत्त्वाच्या गोष्टी ती करते. शिवाय, प्रवासात तुमचा ‘सिक्स्थ सेन्स’ जागृत असणे गरजेचे आहे, हे ती आवर्जून सांगते.

आवाहन
तुमचा ‘सोलो’ प्रवासही असाच खास आहे का? आम्हाला तुमच्या सोलो राष्ट्रीय किंवा आंतरराष्ट्रीय प्रवासाची गोष्ट आणि अनुभव जाणून घ्यायला आवडेल. तुमचे अनुभव ३०० शब्दांत लिहून आम्हाला 
maitrin@esakal.com येथे मेल करा.
निवडक अनुभवांना प्रसिद्धी दिली जाईल.