Jungle Trekking : आपल्या आजूबाजूला असे कितीतरी लोक असतात की, ज्यांना अ‍ॅडव्हेंचर अ‍ॅक्टिव्हिटीज करायला आवडतात. या लोकांना निसर्गाच्या सानिध्यात जायला आवडते. निसर्गात फिरायला गेल्यानंतर काहीतरी वेगळा आणि भन्नाट अनुभव काहींना घ्यायला आवडतो. जसे की, जंगलात ट्रेकिंगला जाणे, किंवा एखाद्या उंच किल्ल्यावर चढाई करणे इत्यादी गोष्टी करायला काही लोकांना आवडते.

पर्वतावर किंवा किल्ल्यावर ट्रेकिंग सर्वजण करतात. मात्र, जंगलात ट्रेकिंग करायला फार मोठे धाडस लागते? जर तुम्हाला ही जंगलात ट्रेकिंग करण्याची आवड असेल तर आजचा हा लेख शेवटपर्यंत वाचा. कारण, आज आम्ही तुम्हाला भारतातील अशाच काही ठिकाणांबद्दल सांगणार आहोत. जिथे तुम्ही जंगलात ट्रेकिंग करू शकता. कोणती आहेत ही ठिकाणे? चला तर मग जाणून घेऊयात.

कान्हा नॅशनल पार्क

मध्यप्रदेशात स्थित असलेले कान्हा नॅशनल पार्क हे खरे तर भारतातील सर्वात लहान राष्ट्रीय उद्यान आहे. मात्र, जंगल ट्रेकिंगसाठी हा एक बेस्ट ऑप्शन आहे. या जंगलात सस्तन प्राण्यांच्या तब्बल २२ प्रजाती आहेत. या ठिकाणी येणाऱ्या पर्यटकांना वन्यजीवांना त्यांच्या नैसर्गिक अधिवासात पहायला आवडते.

भारतातील सर्वोत्तम जंगल ट्रेकिंग ठिकाणांपैकी एक म्हणून हे कान्हा नॅशनल पार्कचा ओळखले जाते. या घनदाट जंगलातून ट्रेक करायला, साधारणपणे २-३ तास लागतात. ऑक्टोबर ते जूनच्या अखेरपर्यंत या ठिकाणी भेट देणे सर्वोत्तम आहे. (Kanha National Park Madhya Pradesh)

कुंजखरक ट्रेक

हिमालयाच्या पायथ्याशी असलेल्या कॉर्बेटजवळील पंगोटपासून हा कुंजखरक ट्रेक सुरू होतो. हे जंगल ट्रेकिंगचे ठिकाण उत्तराखंड राज्यात स्थित आहे. ज्यांना निसर्गाच्या सानिध्यात निवांत वेळ घालवायचा आहे, ज्यांना अधिक गर्दी नको आहे. त्यांच्यासाठी हा जंगल ट्रेक बेस्ट पर्याय ठरू शकतो.

या ठिकाणी ट्रेकिंग करताना तुम्हाला उंच पाईन झाडे दृष्टीस पडतील. त्यासोबतच कोसी नदी वाटेत भेटेल, ती पार करून तुम्हाला पलिकडे जावे लागेल. भारतातील जंगल ट्रेकिंगसाठी तुम्ही या ठिकाणाची निवड करू शकता. ऑक्टोबर ते एप्रिल हा येथे भेट देण्याचा सर्वोत्तम कालावधी मानला जातो. (Kunjkharak Trek)