गांधीनगर : सिंह ही गुजरातची ओळख. पण या सिंहाचा पराक्रम पाहून तुम्हाला धक्का बसेल. गुजरातच्या राजुळा इथल्या एका खासगी कंपनीत हे वनराज अवतरले. कंपनीत जेव्हा सिंहाची एन्ट्री झाली तेव्हा काही कर्मचारी देखील या कंपनीत काम करत होते. सिंहाला पाहताच त्यांची बोबडी वळली. हा सर्व प्रकार कंपनीतील सीसीटीव्ही कॅमेरॅत कैद झाला आहे. (Caught on cam Lion enters private company in Gujarat)

सीसीटीव्ही फुटेजनुसार, हा जंगली सिंह थेट कंपनीत शिरला त्यानंतर तो लॉबीमध्ये मनसोक्त फिरत होता. कंपनीच्या मुख्य हॉलमध्येही त्यानं प्रवेश केला. काही कर्मचाऱ्यांनी हा सिंह दिसल्यानं त्यांना धडकीच भरली होती, ते प्रचंड घाबरले होते. कंपनीतील कर्मचाऱ्यांची तक्रार वनखात्याकडं आल्यानंतर या सिंहाचा कंपनीच्या परिसरात कसून शोध घेण्यात आला. पण सिंह काही त्यांच्या हाती लागला नाही.

अमरेली जिल्ह्यातील एका गावात नुकतेच आठ गिरमधील सिंह दिसून आले होते. त्यानंतर चक्क एका खासगी कंपनीतच सिंह घुसऱ्याची ही घटना घडली आहे. स्थानिकांच्या माहितीनुसार, या भागात सिंह दिसणं ही नेहमीची बातमी आहे.