Jackie Shroff Special Egg Curry Patta Recipe : चाहत्यांचे लाडके जग्गूदादा म्हणजेच प्रसिद्ध ज्येष्ठ अभिनेते जॅकी श्रॉफ यांचा एक व्हिडीओ सध्या मोठ्याप्रमाणात व्हायरल होत आहे. जग्गूदादा हे खाण्यांचे शौकीन आहेत. त्यांनी वेगवेगळे पदार्थ ट्राय करायला फार आवडतात, तसेच काही पदार्थ ते स्वतःही फार आवडीने बनवतात.

असाच एक त्यांचा फेव्हरेट पदार्थ बनवण्याची रेसिपी त्यांनी या व्हिडीओत सांगितली आहे. त्यांची रेसिपी सांगण्याची हटके पद्धत, साधेपणा आणि प्रत्येक कृती करण्यातले बारकावे सांगण्याची पद्धत यामुळे नेटकऱ्यांना या व्हिडीओने वेड लावले आहे. इंस्टाग्रामवर फूड अँड फ्रॉलिक या अपना भिडू इंस्टाग्राम पेजवर हा व्हिडीओ शेअर झाला आहे. जग्गूदादाने सांगितल्याप्रमाणे या अगदी स्टेप बाय स्टेप रेसिपी करतानाचा व्हिडीओही टाकण्यात आला आहे.

या व्हिडीओला लोकांनी फारच डोक्यावर घेतले. मोठ्याप्रमाणात लाइक्स आणि शेअर करण्यात आले आहे. काहींनी यावर टायगर श्रॉफच्या बॉडीचं हेच सिक्रेट आहे अशी कमेंट केली तर बरेच लोक जॅकी श्रॉफ यांच्या रेसिपी सांगण्याच्या शैलीवर फीदा होऊन हा माणूस आम्हाला फार आवडतो अशी कमेंट केली आहे. तर एकाने व्हिडीओ जेवढ्या क्रिएटिव्ह पद्धतीने बनवण्यात आला आहे, त्याचे कौतुक केले आहे.