दोन दिवसांपूर्वी शाळेतील एका लहान मुलाचा व्हिडिओ सोशल मीडियावर व्हायरल झाला होता. प्रजासत्ताक दिनाच्या दिवशी शाळेत ध्वजारोहणाच्या कार्यक्रमात विनोदी भाषण करत त्याने प्रेक्षकांची मने जिंकली होती. "आजपासून भारतात लोकशाही लागू झाली असून आपण लोकशाहीमध्ये काहीही करू शकतो. मला तर मोक्कार धिंगाणा करायला आवडतं" अशा भाषणामुळे त्याने लोकांना अक्षरश: पोट धरून हसायला लावलं होतं.

हेही वाचा - ....इथं तयार होतो आपला लाडका तिरंगा

कार्तिक वजीर असं या चिमुकल्याचं नाव असून तो जालना जिल्ह्यातील अंबड तालुक्यातील रेवलगाव येथील जिल्हा परिषदेच्या शाळेत शिकत असल्याची माहिती आहे. या शाळेतील तो पहिलीचा विद्यार्थी असून त्याचे वडील शेतकरी आहेत. त्याच्या घरची परिस्थितीही बिकट असून तो लहानपणापासून खोडकर असल्याची माहिती आहे. त्याला रातांधळेपणा हा आजार असल्यामुळे त्याला दिसायला कमी आहे. त्यामुळे तो वर्गात फळ्याच्या जवळ बसतो. तर तो दिसायला गोरा असल्यामुळे त्याला सर्वजण भुऱ्या या नावाने चिडवतात अशी माहिती मिळाली आहे.

शिक्षकाने लिहून दिलं होतं भाषण

सुरूवातील त्याला प्रजासत्ताक दिनी भाषण करण्याची संधी देण्यात आली नव्हती पण त्याच्या हट्टामुळे त्याला नंतर संधी देण्यात आली. त्याच्या शिक्षकाने त्याला भाषण लिहून दिले होते. भारत मस्के असं त्याच्या शिक्षकाचं नाव असून त्यांनी त्याच्या बहिणीकडून कार्तिकच्या भाषणाची तयारी करून घेतल्याची माहिती आहे. तर त्याच्या रातांधळेपणाच्या आजारावर लवकरात लवकर उपचार व्हायला हवेत असं मत त्याच्या शिक्षकाने व्यक्त केले आहेत.

त्याने भाषणात काय म्हटलं होतं?

"लोकशाही असल्यामुळे मी खेळतो, मोक्कार धिंगाणा करतो, माकडासारखा झाडावर चढतो तर लोकशाही असल्यामुळे मला माझे वडील काहीच बोलत नाहीत. पण काही मुलं माझं नाव शाळेतील सरांना सांगतात आणि काही जण जसं लोकशाहीला पायदळी तुडवतात तसंच सर देखील मला पायदळी तुडवतात. पण मी खूप गरिब आहे, माझ्याएवढा गरिब अख्ख्या तालुक्यात कुणीच नसेल" अशा शब्दांत भाषण करत त्याने अक्षरश: प्रेक्षकांची मने जिंकली होती.