नाशिक : 13 वर्षीय अल्पवयीन मुलीवर प्रेम करण्यासाठी जबरदस्ती करणारा व भररस्त्यात अडवून तिचा विनयभंग करणाऱ्या आरोपीला जिल्हा व सत्र न्यायालयाचे प्रधान न्यायधीश सूर्यकांत शिंदे यांनी 3 वर्षे सक्तमजुरी व 2 हजार रुपयांच्या दंडाची शिक्षा ठोठावली. अनिल महादेव रणशूर (21, रा. खवणपिंप्री, ता. सेलू, जि. परभणी) असे आरोपीचे नाव असून सदरची घटना 6 एप्रिल 2015 ला वेदमंदिरासमोर घडली होती. 

पीडित 13 वर्षीय मुलीच्या पालकांनी दिलेल्या फिर्यादीनुसार, सरकारवाडा पोलिसात पोस्को व विनयभंगाचा गुन्हा दाखल आहे. आरोपी अनिल रणशूर याने सातत्याने पिडित मुलीचा पाठलाग करून एकतर्फी प्रेमातून प्रेम करण्यासाठी दमदाटी करीत होता. 6 एप्रिल 2015 ला त्याने पीडित मुलीला वेदमंदिरासमोर अडविले आणि तिला बळजबरीने फिरायला येण्यासाठी धमकावत होता. तिने नकार दिला असता, अश्‍लिल चाळे करीत तिचा विनयभंग केला. तसेच, यापूर्वीही त्याने अनेकदा तिचा पाठलाग केला आणि तिच्या पालकांनाही फोन करून जीवे मारण्याची धमकी दिली होती. याप्रकरणी पोलिसात गुन्हा दाखल होऊन त्यास अटक करण्यात आली. 

याप्रकरणी जिल्हा व सत्र न्यायालयाचे प्रधान न्यायधीश सूर्यकांत शिंदे यांच्यासमोर खटला चालला. यावेळी सरकारी पक्षातर्फे अॅड. शिरिष कडवे यांनी बाजू मांडताना 7 साक्षीदार तपासले. पीडित व तिच्या पालकांसह तपासी अधिकाऱ्यांची साक्ष महत्त्वपूर्ण ठरली. त्याआधारे आरोप सिद्ध झाल्याने आरोपी रणशूर यास 3 वर्षे सक्तमजुरी व 2 हजार रुपये दंडाची शिक्षा ठोठावली. सरकारी वकील अॅड. कापसे यांनीही या खटल्याचे कामकाज पाहिले होते. तर, सरकारवाड्याच्या महिला पोलिस उपनिरीक्षक श्रीमती बेलेकर यांनी तपास केला होता.