कापडणे (जि. धुळे) : कमरेला ढोल बांधलेले. हाताला आणि कंबरेला घुंगरू माळ बांधलेली. डोक्यात सुवर्ण महोत्सवी प्रतीक असलेली टोपी. थोर नेत्यांचे फोटो असलेले बॅनर. तिरंगा ध्वज लावलेले अन्‌ चाळीस किलोचे वजन तोलीत, ते पदयात्रेला निघालेले आहेत.

ढोल वाजवीत घुंगरांचा छुनछुन आवाज आणि पिपाणीवर देशभक्तीची गीते वाजवित साऱ्यांचेच लक्ष वेधून घेत आहेत. इंदूरचे लक्ष्मण गणवीर युवकांमध्ये देशभक्ती जागविण्यासाठी भ्रमंतीसाठी बाहेर पडले आहेत. (Amrit Mahotsav Sadbhavana Padayatra by Ganveer Tour across state dhule Latest Marathi News)

लक्ष्मण गणवीर यांच्याजवळ वयाच्या सत्तरीतही दुर्दम्य इच्छा शक्ती आहे. देशातील वातावरण बघून व्यथित होत आहेत. सध्या राष्ट्रभक्ती कमी आणि राजकीय भक्ती अधिक वाढलेली आहे. युवकांमध्ये राष्ट्रभक्ती जागविण्यासाठी बाहेर पडलो आहे. मध्य प्रदेशमध्ये सद्भावना यात्रा पूर्ण झाली आहे. आता महाराष्ट्रभर फिरायचे आहे, असे गणवीर यांनी सांगितले.

गणवीर यांच्याजवळ पपैया, ढोलक आणि घुंगरू साखळी आहे. इको माईक आणि स्पीकर सिस्टम आहे. पपैयावर सुमधुर गीते वाजवतात. देशभक्तिपर गीते आणि त्यांच्या जोडीला शेरोशायरी यामुळे ते देशभक्तीची प्रेरणा देण्यात यशस्वी ठरत आहेत.

त्यांची मुले नोकरीला आहेत. त्यांना मात्र देशभक्ती जागविण्यासाठी काढलेली पदयात्रा निश्चितच प्रेरणादायी ठरत आहे. गणवीर सध्या धुळे शहरात ठिकठिकाणी फिरत आहेत. दोन दिवसांनंतर शिर्डीकडे प्रस्थान करणार आहेत. आतापर्यंत त्यांचा दोन हजार किमीचा पायी प्रवास झालेला आहे.