नाशिक - पुणेस्थित मालकाच्या अंबड औद्योगिक वसाहतीतील कंपनीची संशयितांनी संगनमताने बनावट कागदपत्रे बनवून कंपनीत अनधिकृतरीत्या प्रवेश केला. कंपनीची पाच कोटी 70 लाखांच्या मशिनरीची परस्पर विक्री केल्याचा प्रकार उघडकीस आला. याप्रकरणी संशयित राजू शंकर पवार, ज्ञानोबा जाधव, ए. जी. बांधेकर, प्रकाश बांधेकर व माधवी बांधेकर यांच्याविरोधात अंबड पोलिसांत गुन्हा नोंदविण्यात आला आहे. 

सकाळचे मोबाईल अॅप्लिकेशन डाऊनलोड करण्यासाठी क्लिक करा

दिनेश सुभाष चंद्रा (रा. वसुंधरा, महंमदवाडी, पुणे) यांच्या फिर्यादीनुसार अंबड औद्योगिक वसाहतीत त्यांची "डीन इंजिनिअरिंग कॉर्पोरेशन' या नावाची कंपनी आहे. गेल्या 17 मे 2016 पासून संशयितांनी संगनमत करून दिनेश चंद्रा यांचा विश्‍वास संपादन केला. त्याच विश्‍वासाच्या आधारे संशयितांनी कंपनीच्या नावाची बनावट कागदपत्रे तयार केली. कंपनीच्या नावाचे आणि मालक चंद्रा यांच्या सहीचे शिक्केही तयार केले. कागदपत्रे बनावट असताना ती खरी असल्याचा बनाव रचत वापर केला. संशयित ए. जी. बांधेकर, प्रकाश व माधवी बांधेकर यांनी या बनावट कागदपत्रांच्या आधारे कंपनीतील पाच कोटी 70 लाखांची मशिनरीची परस्पर विक्री करून कंपनीचे मालक दिनेश चंद्रा यांची आर्थिक फसवणूक केली. हा प्रकार लक्षात आल्यानंतर चंद्रा यांनी पोलिसांकडे धाव घेतली.