मेहुणबारे (ता.चाळीसगाव) : गेल्या अनेक दिवसांपासून वनविभागाच्या हातावर तुरी देणार्‍या बिबट्याला अखेर रविवारच्या मध्यरात्री पिंपळवाड म्हाळसा (ता.चाळीसगाव) येथील गोटु देशमुख यांच्या शेतात लावलेल्या पिंजऱ्यात कैद करण्यात आले आहे. घटनास्थळी वनविभागाचे पथकही दाखल झाले आहे.

वरखेडे परिसरात मागील वर्षी याच भागात बिबट्याने हैदोस घातला होता. त्यानंतर पुन्हा एकदा या परिसरात बिबट्या  अनेकांच्या नजरेस पडला होता. या परिसरात बिबट्याने अनेक पशुधनाचा फडशा पाडला होता. त्यामुळे वनविभाग देखील बिबट्याला पकडण्यासाठी शर्थीचे प्रयत्न करत होते.

आज पिंपळवाड म्हाळसा येथील गोटु देशमुख यांच्या शेतात पिंजऱ्यात कैद झाला. येथे बिबट्याला पाहण्यासाठी आजुबाजुच्या नागरिकांनी एकच गर्दी केली होती. या ठिकाणी बिबट्याला घेवुन जाण्यासाठी वनविभागाचे कर्मचारी आले असुन हा बिबटय़ा साधारण दोन वर्षे वयाचा असल्याचा अंदाज वनविभागाने वर्तविला आहे.