सोनगीर : गुटख्याची वाहतूक करणाऱ्या वाहनासह संशयिताला येथील पोलिसांनी ताब्यात घेतले असून, त्याच्याकडून सुमारे पाच लाखांचा गुटखा व दहा लाखांचे वाहन असा सुमारे १५ लाखांचा मुद्देमाल जप्त करण्यात आला. सोमवारी (ता. १५) सायंकाळी सहाच्या सुमारास सोनगीर फाट्यावर ही कारवाई झाली. (Dhule Crime Gutkha worth 5 lakhs seized in operation at Songir Phata)

दिल्लीहून महाराष्ट्रात गुटखा आणला जात असल्याची माहिती मिळाल्यावरून येथील सहाय्यक पोलिस निरीक्षक जयेश खलाणे यांनी सोनगीर फाट्याजवळ सापळा लावला. सायंकाळी सोनगीरकडे येणारा ट्रक (एनएल ०१, एडी ९९३८) थांबवून तपासणी केली असता त्यात दहा पोत्यांत सुमारे चार लाख ९२ हजार ४८० रुपये किमतीचा राज्यात प्रतिबंधित एसएचके गुटखाची पाकिटे आढळून आली.

गुटखा व दहा लाखांचे वाहन असा १४ लाख ९२ हजार ४८० रुपयांचा मुद्देमाल हस्तगत केला. संशयित वाहनचालक ब्रजेशकुमार श्रीअशोक यादव (वय २९, रा. दुर्गापूर, शेरवान, जि. जौनपूर, उत्तर प्रदेश) यास अटक करण्यात आली.

अन्नसुरक्षा प्रशासन अधिकारी किशोर बाविस्कर यांनी पोलिस ठाण्यात गुन्हा दाखल केला. पोलिस उपनिरीक्षक सुकदेव धरम तपास करीत आहेत. ही कारवाई पोलिस अधीक्षक श्रीकांत धिवरे, अपर पोलिस अधीक्षक किशोर काळे.

उपविभागीय पोलिस अधिकारी साजन सोनवणे यांच्या मार्गदर्शनाखाली सहाय्यक पोलिस निरीक्षक जयेश खलाणे, उपनिरीक्षक रवींद्र महाले, सुकदेव धरम, पोलिस अविनाश कराड, प्रदीप धिवरे यांनी केली.